KNR-imi oqalliffik nutaaq
KNR-imi Oqalliffik sisamanngornerit allortarlugit ullaap tungaa nalunaaqutaq quliniit aqqarnup tungaanut aallakaatinneqartassaaq ullorlu taanna kingusinnerusukkut tv-mi aallakaatinneqartassalluni.
- Isumaqarpugut oqaluttuat soqutiginartorpassuit KNR-imi sammineqartartut Nutaarsiassatiguinnaq ingerlanneqartartut. Sivisunerulaartumik isornartorsiuinerusumik sammineqarnissaat amigaatigilaarparput, tassani oqaluttuat pisullu itisilernerusinnaassavagut. Aallakaatitaq nutaaq atorlugu tamanna angorusupparput, KNR-imi Nutaarsiassaqartitsivimmi pisortaq, Mikkel Bjarnø Lund oqarpoq.
KNR-imi Oqalliffik siullermik kalaallisut minutsini 30-ni aallakaatinneqartassaaq kingornalu minutsit 25-it qallunaatut ingerlanneqartassalluni radiop aallakaatitsiviani ingerlanneqartassalluni.
- Ilusilerneqarnera annertuuliutigineqassanngilaq. Akikitsumik suliarineqassaaq. Pulaartut marluk pingasulluunniit tusagasassiortorlu ataaseq radiop aallakaatitsivianiittassapput. TV-mut assiliissutit ikissinnarlugit sapaatip akunnerani pisut sammineqarnerpaat isornartorsiortumik oqallisigineqartassapput. Tv-mut tunngatillugu suliarujussuunngilaq, tassaavorlu nukissaqarfigisinnaasarput, aamma ajunngissaqaaq, nutaarsiassaqartitsivimmi pisortaq oqarpoq.
Tusagassiortut radiomik aallakaatitassiortut, Qanoruumeersut aamma radioaviisimeersut paarlakaajaallutik aaqqissuisuusassapput.
- Sulisutta pikkorissut amerlanerusut isiginnaartartunut takutinnissaat qilanaarivarput, Mikkel Bjarnø Lund oqarpoq.
KNR-imi Oqalliffik siullerpaamik aallakaatinneqassaq sisamanngorneq apriilip 26-iat nalunaaqutaq qulinut unnukkullu nalunaaqutaq 20.00 tv-mi takutinneqassalluni.
