KNR-imi Oqalliffik: Ilinniartitsisut suaartaateqarput
Atuartitsissutigineqartussatut pilersaarutigineqartut malillugit atuartitserusuppugut meqqat angerlarsimaffimminni ajornartorsiutaat atuartitsinermi atornagit.
Atuartitsiserusuppugut socialrådgiverit suliassai suliarikatappagut, angajoqqaat akisussaaffitik tigusariaqalerpaat suleqataasariaqalerput, USK-imi ilinniartitsisut 14it Naalakkersuisumut Nick Nielsen-imut allakkaminni taama allapput.
Angajoqqaanik suleqateqarnissamik politikeriniillu tapersersorneqarnissamik ilinniartitsisut allakkaminni kaammaattuuteqarput
Ilinniartitsisut ulluinarni sulinerminni ajornartorsiutigisartakkatik saqqummiuppaat, soorlu
meeqqanut atuartitsinermi malinnaasinnaanngitsunut piffissaq annertooq illiniartitsisut atortariaqartarpaat, taakkualu atuartunut ingerlalluartunut pilliutigineqartariaqartarluni.
Ajornartorsiuterpassuit ilinniartitsisut sulinerminni nalaattagaat pissutigalugit ilinniartitsusut napparsimakulasarput, ilinniartitsusullu ammasumik allakkaminni apeqqusiipput sooq ilinniartitsisut atugaat pillugit misissuissitsisoqassannginnersoq.
Atuartitsisut atuartitsissutigineqartussanik pilersaarusiortarput ajoraluartumilli pilersaarusiaat kinguaattoortarput ilaatigut atuartut atuariartortarmata , atuagaasiveqaratik, ilinniagassatik ilinniarsimanagit, atuakkatik tammarsimamatigik, sinnattorsimasaramik , atuanngitsuukulanerilu ilaatigut pissutaallutik, ilinniartitsisoqatigiit 14iusut Nuummi atuarfimmi Ukaliusami ilinniaritsisut taama allapput.
Ilinniartitisut atukkatik pillugit politikerinik oqaloqateqarusupput.
Soorluttaaq politikerinik suleqateqarusupput minnerunngitsumillu angajoqqaanik.
Ilinniartitsut atugaat pillugit KNR-imi oqalliffimmi annerusumik tusagaqarsinnaavusi.
Oqalliffimmi peqataassapput Ukaliusami ilinniartitsisut Naalakkersuisumut ammasumik allagaqartut ilaat Karen Hjort kiisalu politikerit Monica Dorph aamma Anda Uldum taakkua meeqqat atuarfianni pissutsit pillugit sammisaqarput.
Oqalliffik KNR radio-mi qulinut aallakaatinneqassaaq qallunaatut aqqanernut qitequppat.
Oqalliffik KNR-TV-kkut unnugu arfineq pingasunut qiteqquppat aallakaatissaaq qallunaatut arfineq pigasunut.
