KNR-imi nutaarsiassaqartitsinermi pisortaq toqqarneqarpoq

Tusagassiortoq Frederik Lund nutaarsiassaqartitsinermi pisortatut KNR-ip nutaarsiassaqartitsiviani aallartissaaq 15. maj 2009.
Allattoq Lotte Holm
maajip 07-at 2009 13:01

Frederik Lund KNR-imi radiumi tv-milu tusagassiortutut sulereernikuuvoq, piffissamilu sivikitsumi Qanorooq-mi aaqqissuisutut sulinikuulluni. Piffissamilu kingullermi KNR-ip siulersuisuini siulittaasuusimavoq, tamannalu atorfik 1.april qimappaa.

- Frederik Lundip illumut uteqqinnissaa qilanaarutigaarput, KNR-ip pisortaa Ivalo Egede oqarpoq, nangillunilu:

- Radioaviisimi Qanorooq-milu aaqqissuisut qaninnerulernissaat pingaaruteqarpoq, KNR-ip nutaarsiassaqartitsiviini sulisunut tamanut ataatsimut pisortaqalerneq pitsanguutaasussaalluni.

Frederik Lundip nutaarsiassaqartitsivinni pitsaassutsip qaffarsarnissaa qulakkeertussaassavaa, kiisalu nutaarsiassaqartitsiviit tamakkerlugit ingerlaavartumik ataqatigiissaarnissaat suliassaralugu, radioaviisimi Qanorooq-milu aaqqissuisut qanimut suleqatigilluinnarlugit.