KNR-imi siulersuisuni siulittaasoq, Juaaka Lyberth KNR-illu pisortaa Lars Lennert Sandgreen atortunik nutarterinissamik isumaqatigiissummik ualeq manna atsioqatigiipput.
Isumaqatigiissut 13,5 million koruuninik akeqarpoq, suleqatigiinnissamullu isumaqatigissiusiorfigineqarluni suliffeqarfik AVIT-systems. Taakkua isumagissavaat, KNR-imi atortunik nutarsaanissami atortunik tulluarsakkanik tunniussisarnissaq, soorlu qarasaasiat, assiliiviit immiussanillu katiterinermut atortut.
2007-imi maajip 18-ia aallarnerfigalugu. atortut nutaat siulliit atorlugit KNR-i aallakaatitsisinnaalissaaq.
- Assiliaq nipilu pitsaasoq isiginnaartartut natsorsuutigisinnaalissavaat. Aamma aallakaatitassiorneq eqaannerusoq sukkanerusorlu ingerlanneqarsinnaalissaaq, taamaasillunilu kalaallisut aallakaatitassiat amerlanerusut naammassineqarsinnaalissallutik, KNR-imi pisortaq Lars Lennert Sandgreen oqarpoq nangillubnilu:
- KNR-imi sulisut pikkorissartinneqarnissaanik tamanna kinguneqassaaq, isiginnaartartullu sulianik pitsaanerusunik takusaqartalernissaat naatsorsuutigineqarsinnaassaaq.