KNR digitalimut ikaarsaarpoq
Atortorissaaruterpassuit millionerpaalunnik nalillit, KNR-imilu sulisut qaammaterpaalunni kingullerni nutaanut ikaarsaariarnermi ulapissimaqisut suliaat, TV-mi aallakaatitsinerit nalunaaqutaq 13.50 aallartippata takuneqarsinnaanngussapput.
Isiginnaartartulli allannguutinik aallaqqaammut malugisaqarsinnaarpiarnavianngitsut KNR-imi pisortaq Lars Lennert-Sandgreen oqarpoq:
-Taanna pissanngatigilaartorujussuuarput. Nuunneq aanna annertugami uagutsinnut atortorissaarutit nutaat illup iluani ikkussuunneqarnikut nassitsissummut nutaanut nuunneqartussaagamik.
Soormitaavaana digitaliseeriinik pisariaqalersimasoq?
-Peqqutit arlaqarput: Ilaatigut atortorissaarutit ullumi atukkagut kingoraartissaaluunniit pissarsiariuminaassinikorujussuupput, aamma atorunnaaraluttuinnarneqaramik. Taamaattumik pisariaqavissimasoq digitalimt nuunnissarput, aamma illup iluani radio TV-lu suleqatigiissinnissaat eqaannerusumik siunertaralugu digitalimut nuunnissarput ilungersuutigalugu sulissutigisimavarput. Ullumikkullu angusimalerparput.
Isiginnaartartut allannguutit qanoq malugissavaat?
- Annertunerusumik malugineqartussaanngilaq. TV-kkut soorlu katitereriaaserput illup iluani takuneqarnerani angerlarsimaffinni, unali soorunami sungiunneqaleriarpat sulisuninngaanniit assersuutigalugu Qanorooq grafikkiginnerusoq – allagartaami malunnarsereerput – aamma sulisut sungiussiartoriarpata immaqa soorunami naatsorsuutigaarput Qanorooq-p talliartuaarnissaa. Aamma radio TV-llu suleqatigiinnerulernerat eqqarsaatigalugu internetikkut periarfissat atorluarnerulersinnaasussaassavagut, KNR-imi pisortaq Lars Lennert-Sandgreen taama oqarpoq.
