KNR aliikkutassiamik nutaamik aallakaatitsisalerpoq
Isiginnaagassiaq ateqarpoq ”Unnugiaq" tallimanngornerit tamaasa qulingiluaniit qulip-qeqqata tungaanut maajip qeqqata tungaanut aallakaatinneqartassaaq.
Tassanilu takutitassiisartussaq tassaavoq Andreas Poulsen, raatiukkut aallakaatitsisarnermigut ilisimaneqartoq.
Andreas aallakaatitassiap ingerlanerani inunnik saqqumilaartunik pulaartoqartassaaq eqquiniaasitsillunilu.
Aallakaatitap ingerlanerani Hans-Jukku Noahsen nipilersoqatini peqatigalugit appisimaartassapput, sapaatillu akunneri tamaasa inummik ilisimaneqarluartumik appisimaaqataasartussamik pulaartoqartassapput.
Illarnartumik takutitassiisarneratigut ilisarisimalluagarput Piitannguaq Alaufesen aamma aallakaatitap ingerlanerani illartitsillattaasarumaarpoq.
Sammineqartartussalli taakkuinnaassanngitsut aallakaatitassiamik aqutsisoq Aannguaq Nielsen oqarpoq.
- Aallakaatitammi ingerlanerani isiginnaartartut SMS aqqutigalugu eqquiniaanissaminnut periarfissaqartassapput, tassanilu eqqugassatut periarfissaapput: 4.000 kr., 6.000 kr. aamma 10.000 kr.
