KNR 1,6 millioni koruuninik amigartoorpoq
Ukiumut 2009-mut naatsorsuutit KNR-imi siulersuisut marsip 30-anni 2010-mi ataatsimiinnerminni akuersissutigaat.
Naatsorsuutigineqareersutut KNR radioqarfiullunilu tv-qarfik pisortanit aningaasalersorneqartoq siorna 1,6 mio. koruuninik amigartooruteqarpoq.
Tamatumunnga pingaarnertut pissutaavoq ussassaarutit naatsorsuutigisamik ikinnerit tunineqarsimammata, sulisut 2007-imi 2008-milu qaangiuttoornersiaat tunniunneqarsimammata kiisalu suliunnaarnikunut sulinngiffeqarnermi akissarsiassaat tunniunneqarsimallutik.
Sulisunik atortunillu nalimmassaanerit pinikuummata aaqqissuusseqqittoqarnikuullunilu 2010-mi amigartooruteqannginnissaq KNR-ip naatsorsuutigaa, KNR-ip pisortaa Ivalo Egede taama ilisimatitsivoq.