KNR 10,8 millioni koruuninik amingartoorpoq

KNR 2007-mi 1,7 millioni koruuninik sinneqartoorsimasinnaagaluarpoq suliffeqarfittut allatulli naatsorsueriaaseqarsimasuugaluaruni. Namminersornerullutik Oqartussalli naatsorsueriaatsimut aalajangersagai malinneqartussaammata KNR 2007-mi 10,8 millioni koruuninik amingartoorpoq.
Allattoq Louise M. Kleemann
marsip 18-at 2008 13:22

Amingartoornermut peqqutaavoq Namminersornerullutik Oqartussat 17 millioni koruunik attarsiffigisariaqarsimanerat. KNR, imminut pigisutut ingerlasimasuuppat pisiarineqartut ukiumiit ukiumut nalikillineqartarsinnaasimassagaluarput kinguneranillu 1,7 millioner koruuninik sinneqartoortoqarluni.

Tamakku tunngavilersuutigalugit KNR-ip siulersuisortaavisa 2007-mut naatsorsuutit akueraat.

KNR-ip aningaasatigut atugai minnerunngitsumillu naalaartartut, isiginnaartartut, qarasaasiarlu atorlugu nutaarsiassanik malinnaasut, kissaataat piumasaallu tunngavigalugit, Kalaallit Nunaata Radioani siulersuisunngortut isumaqatigiissutigaat, suliffeqarfiup pigineqarneranut tunngasut naatsorsuuserinermilu malitassaritinneqartut allanngortinneqartariaqartut aammalu KNR immikkut aningaasaliiffigisariaqartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq