KNIp ukiup affaanut naatsorsuutai saqqummiunneqarput
KNI-p siorna naatsorsuutai, naammaginanngilluinartut saqqummiunneqareersut – ukioq manna KNI A/S-ip ukiup affaanut naatsorsuutai qiimmaamminarnerulaarput, naatsorsuutinimi atuarneqarsinnaavoq sinneqartoorutit akileraarutit ilanngaatiginnginneranni 22,2 million koruuniusut.
- Nuannaarutigaara kisitsisit qernertumik allanneqarsimammata, tassa iluanaarutitut, ukiummi kingulliit amigartoortareeratta. Sinneqartoornerput nuannaarutigigaluarlugu oqaatigisariaqarpara 22,2 millionit sinneqartoorutigigaluarlugit naammaginanngillat.
Taamatut KNI A/S-ip pisortaa, Søren Lennert Mortensen, Jakob Strømimit apersorneqarluni oqarpoq.
- Sinneqartoornermut pissutaanerpaapput ajornartorsiuteqarfigisatta, tassa nunaqarfinnik pilersuinerup, Arctic Green Foodillu, KNI-mut atajunnaarnerat.
KNIp siunissami aningaasarsiorfigisassai marluupput tassalu Pilersuisumi niuerneq, Polaroilimilu uuliamik tuniniaaneq.
