KNI ukiup affaani siullermi sinneqartoorpoq
Ungasissorsuunngitsukkut KNI-p aningaasarsiorfigilluakkani, Pilersuisumi niuerneq uuliamillu tuniniaaneq, kisiisa aallussinaanngussagai – tassa piginneqataaffiusut siorna amigartoorermut peqqutaasut tunereersimassammata. Ukiup affaani siullermi naatsorsuutini takuneqarsinnaavoq naamaginaannaraluartunik 22,2 million koruuninik sinneqartoortoq.
- Taamaakkaluartoq suli suliassaqaqaagut, nunaqarfinnimi niuerneq annikilliartormat, KNI A/S-imi pisortaq Søren Lennert Mortensen, oqarpoq.
Takusinnaavarput nunaqarfinniit illoqarfinniillu minnerusuniit illoqarfinnut annerusunut nutsertoqartoq, taamaammat aningaasartuutivut sukkullu suliffeqarfiit sukaterifigissanerlutigit qiviartariaqarpavut. Aningaasartuutivut millisarsinaavagut, assigiinngitsutigullu sukaterisinnaalluta, soorlu assartuinikkut, tunisassanik pisisarnitsigut, maangaannartartut iginneqartartullu ikilisarsinnaavagut, sulisoqarnerpullu eqqaassagaanni imaassinaavoq sulisut aamma ikilisartariaqassagivut. Eqqaamasariaqarpoq KNI piginneqatigiiffiissuartut ingerlanneqarunnaarmat aktieselskabitulli ingerlanneqalerluni. 2007-immi ingerlanerani piginneqataaffigisavut tusissavagut aappaagulu tassa aktieselskabitut ingerlalertussaalluta, siunissamilu ingerlariaasissatsinnut ikaarsaariartulerutta sukaterisariaqassalluta. Sumiluunniilli pisiniarfinnik matusinissatsinnik pilersaaruteqanngilagut.
Søren Lennert Mortensen-ili erseqqissaalluni oqarpoq maanna nunaqarfinni pisiniarfiit ingerlannerat qanorpiaq akeqarnersoq misissortariaqalerlugu, sullissinissaminnullu Namminersornerullutik Oqartussaniit tapiissutigineqartartut aningaasartuutinut naapertuunnersut naliliifigisariaqalerlugit.
- Imaassinnaavoq sullissinissamut tapiissutit qaffannissaannut qinnuteqariaqalissasugut, imaluunniit nunaqarfinni minnerusuni pisiniarfiit matunissaannut akuersissummik qinnuteqartariaqalissasugut. Tamannali qanittukkut pinavianngitsoq KNI-p pisortaata oqaatigaa.
