KNI ukiup affaani siullermi angusarissaartoq
KNI-p pisortaanera Peter Grønvold Samuelsen sapaammi taama nalunaaruteqarpoq.
KNI ukiup naatsorsuuteqarfiusup 2019/20-p affaani siullermi akileraarutit suli ilanngunnagit 81,1 millionit koruuninik sinneqartooruteqarpoq, siorna ukiup affaani 72,8 millionit koruuninik sinneqartooruteqarluni.
Taamaalilluni missingersuutaareersimasut naapertorlugit angusaqartoq, Peter Grønvold Samuelsen allappoq.
Ilaatigut KNI-p ikummatissamik pilersuisuata Polar Oilip 9 millionit koruuninik sinneqartooruteqarnerusimanera siorna ukiup affaani angusanut sanilliullugu 8,3 millionit koruuninik sinneqartooruteqarnerunermut pissutaavoq.
Nioqqutissanilli pilersuineq 3 millionit koruuninik angusakiffiuneruvoq. Tamanna pingaartumik nioqqutissanik akikilliliisarsimanermik pissuteqartoq KNI nassuiaavoq.
Ukiup naatsorsuuteqarfiusup 2019/20-p affaani kingullermi missingersorneqareersutut akileraarutit suli ilanngunnagit 112 millionit koruunit 118 millionit koruunillu akornanni angunissaat KNI-p naatsorsuutigaa.