KNI A/S aningaasaqarnermigut siuariarsimasoq KNI-mit nalunaarutigineqarpoq. Ukioq kingulleq 2005-imi ukiumoortumik aningaasatigut naatsorsuutit paasinarsisippaat, akileraarutit ilanngaatigereerlugit KNI A/S 19,8 mio. koruuninik sinneqartooruteqartoq.
Arctic Green Food A/S 2005 -imi KNI-p ataaniilerpoq, naak KNI sinneqartooraluartoq Arctic Green Food A/S 5,753 mio. koruuninik akileraarutit ilanngaatigereerlugit amigartooruteqarpoq. Taamatullu amigartooruteqarnermut nipisat suaasa akiisa appariaateqarnerat aammalu qullersaqarfiup Maniitsumut Sisimiunullu nuunneqarneranut aningaasartuutit taamatuttaaq sullissinermut akiliutit annikillinerat peqqutaatinneqarput.
KNI-lli suliffeqarfissua aningaasatigut patajaatsumik inissisimasoq oqaatigineqarpoq. Taamalu sullissinerup ajorseriarnani pitsaanerusumik akikinnerusumillu ingerlanneqarnissaa anguniarneqartoq aammattaaq erseqqissaatigineqarluni.