- KNI-p inuusuttunik 18-iliisimanngitsunik umiarsuarmik Qaanaamut pajuttumik usingiaanermini atornera isornarluinnarpoq,SIK-mi siulitttaasup tullia Josef 'Ujoorsi' Therkelsen ullumi taama allappoq, pajuttaat Arina Arctica sapaatiummat Qaanaamut tikittoq maannalu usingiarneqaleruttortoq pillugu.
SIK-p Qaanaami immikkoortortaqarfiani siulittaasoq Niels Qujaukitsoq SIK-p allaffeqarfianut nalunaarpoq, Qaanaami suliffissaaleqisut amerlagaluartut KNI-mit SIK-mut saaffiginnittoqarsimanngitsoq pajuttaat utaqqisaq tikippat usingiaanermi sulisinnaasunik pissarsiorlutik.
Niels Qujaukitsoq naapertorlugu KNI inuusuttunik inatsisit unioqqutillugit sulisussarsiorsimavoq, inatsisini allaqqavoq inuusuttunik sulisoqarniaraanni inuusuttut sukumiisumik ilinniartinneqassasut 12 kg-lu sinnerlugu oqimaassusillit kiveqqusaanngikkaat, inatsillu tamanna unioqqutinneqarsimasoq SIK isumaqarpoq.
Qaanaami KNI-mi pisortap, Jens Kanuthsenip, SIK-p unnerluutai eqqunnginnerarpai.
- Usingiaanermi suliffissaaleqisut qulit sulisoraagut, tamarmillu 18-ileereersimapput. Taakku namminneq umiarsuaq tikippat sulerusullutik uatsinnut saaffiginnissimapput. Tamannalu pillugu SIK-mut saaffiginnittariaqarsimanngilagut. SIK-mulli isumaqatigiissutit naapertorlugit akisarsiaqarput. Taakku saniatigut angutinik marlunnik maani truckit atorlugit suliffeqarfimmeersunik sulisoqarpugut, containerit prammit atorlugit nunaliaanneranni suleqataasussanik, pisiniarfimmi pisortaq oqarpoq.
- Pisiniarfimmi quersuarmilu inuusuttunik 18-iliineqanngitsunik sulisoqarpugut, taakkuli pisiniarfiup iluani, pisiniarfiullu toqqorsiviani, ilisivinnik immiisutut sulisoraagut. Pisiniarfimmi sulisorivitatsinnit inuusuttut nakkutigineqarput ilitsersorneqarlutillu, taamaammat SIK-p isorinninnera paasisinnaangilara, pisiniarfimmi pisortaq Jens Kanuthsen oqarpoq.
Illoqarfimmi inuit nuannaarput pisiniarfimmi pisiassaqaqqilermat.
- Inuit iluarisimaarinneqaat, pisiniarfimmi pisortaq radioaviisimut oqarpoq