KNI RAL-ilu umiarsualivinnik atuisuullutillu oqartussaapput

Umiarsualivinnut atuisuujutigaluni umiarsualivinni oqartussaaqataaneq KNI-mut Royal Arctic Line-imullu Namminersornerullutik Oqartussat 1993-miilli atuutsippaa. Tamannali ombudsmand-ip inatsisit malillugit eqqortuusorinngimmagu, maanna Inatsisartut umiarsualiveqarnermut inatsit allanngortinnialerpaat KNI-p Royal Arctic Line-llu oqartussaaginnarnissaat atuutitsiinnarniarlugu:

Umiarsualiveqarnermut peqqussutip allanngortinneqarnissaanik siunnersuut Inatsisartuni ippassaq aappassaaneerneqarmat Demokraatit partiini kisimiillutik akerliupput. Partiip oqaaseqartuata Esmar Bergstrøm-ip allannguiniarneq pissusissamisuunngissorivaa, isumaqarluni atuisuujutigaluni oqartussaasuuneq eqqortuunngitsoq:

-Soqutigisat akulerutitsinneqarnissaat eqqunngitsuuvoq. Umiarsualivinni oqartussaasoq nammineq atuisuuuguni ajornanngitsuaqqamik nammineq soqutigisani salliutissinnaavai, Esmar Bergstrøm oqarpoq.

Atuisuujutigaluni oqartussaaneq pissutigalugu ombudsmandip nunatsinni umiarsualiveqarnermut peqqussut paasiniaavigaa, kilisaatit naalagaasa ilaat umiarsualivimmiit usingiarneq naammassinngiitsoq peeqquneqareerluni naammagittaalliuteqareernerata kingorna. Naammagittaalliut suli aalajangiivigineqanngilaq.

Ombudsmandip erseqqissaatigisimavaa umiarsualiveqarnermut peqqussut maanna atuuttoq piginneqatigiilluni suliffeqarfimmut oqartussaanermik pisinnaatitsinngitsoq aammalu naammagittaaliorsinnaanermut periarfissaqartitsinngitsoq.

Peqqussut nutaaq siunnersuutigineqartoq malillugu Ineqarnermut Attaveqarnermullu Naalakkersuisoq naammagittaalliorsinnanermut periarfissaalissaaq.

Kommunit aaqqissuuteqqinnissaannut ataatsimiisitaliap innersuussutigaa kommunit umiarsualiveqarnermut oqartussaaneq tigussagaat.

Ineqarnermut Attaveqarnermullu Naalakkersuisoq Jørgen Wæver Johansen aperaarput sooq aaqqisuusseqqinnermut ataatsimiititaliarsuup innersuussutaa malinneqanngitsoq, akivoq:

- Inassutigineqartoq suli Inatsisartuni oqaluuserineqanngilaq, taamaattumik inatsisartuni oqaluuserineqareerpata siunissami aaqqiissuussinerit aalajangiivigineqarumaarput, Jørgen Wæver Johansen oqarpoq, nangillunilu:- aaqqissuussinitsinni allaavigisimasarput tassaavoq ingerlatseqatigiiffiit pisortat pigisaat sumiiffinni taakkunani tamani suliaqarlutillu sulisoqarmata taakkuussasut umiarsualivinnik nakkutilliinermik ingerlatsisut, Jørgen Wæver Johansen oqarpoq.

Kommunit aaqqissuuteqqinnissaannut ataatsimiisitaliap innersuussutai Inatsisartuni maajimi oqaluuserineqassapput.