KNI pillugu immikkut ittumik ataatsimeersuartoqalerpoq

Naalakkersuisut aalajangerput, KNI pillugu immikkut ittumik ataatsimeersuartoqassasoq, taama naalakkersuisoqarfimmiit tusarfiit tutsuiginartut Sermitsiamut oqarsimapput.

Politikerit taama aalajangernerat pivoq, Københavnimi pingasunngormat ataatsimiittoqarnerani.

Sermitsiap tusarfii naapertorlugit, naalakkersuisut taama aalajangertariaqalersimapput, KNI allanik akisussaaffeqalermalli aaqqiagiinngissuteqartarnerit pisalermata.

Ilaatigut soorlu, nunaqarfinnut immakkut angallassinerit ukiortaamiit KNI-p akisussaaffigilerpai, siornatigut Royal Arctic Bygdeservice-p akisussaaffigigaluarai.

Taama akisussaaffnnik nutaanik KNI nakkutiginnilermat, naapertuutinngitsunik paasissutissiisoqartarpoq, ilaatigut kiffartuussinerup qanoq pitsaatiginera oqaatiginiarneqartarluni.

Nuka A/S-imulli tunngatillugu, KNI pitsaavallaanngilaq, tassami Nuka A/S-p aningaasatigut sinneqartoortarnerigalua illuatungaanut saappoq, aningaasaqarneralu naqqannilluni.

Angallassinermuttaaq tunngatillugu nalorninartorsiorpoq, KNI-p pisortaa Gerhardt Petersen tamatumunnga tunngatillugu, oqarpoq, nunaqarfinnut angallassinermut tunngatillugu, angalanissamut pilersaarutit eqqorluartut suliarineqarsinnaanngikkallartut. Taamatuttaaq, Uummannap nunaqarfiinut qaatsiartaatip angallassissutaalernissaa arlalitsigut nalornissutigineqarpoq. Tamatumunngalu taarsiullugu, qulimiguulik nunaqarfinnut utaqqiisaasumik angallassissutigineqartassalluni.

Naalakkersuisut qullersatut uparuaapput, KNI assigiinngitsunut siammasippallaamik nakkuginninniarpallaarani eqqarsarluarnerusariaqartoq.

Tamannalu pillugu, Gerhardt Petersen ualimut oqaloqatigaarput, taannalu akivoq, piginnittut kisimik (tassalu Namminersornerullutik Oqartussat), ataatsimeersuartoqarnissaanik kissaateqarsinnaasut. Taakkulu kisimik tamanna aalajangigassarigaat.