KNI pillugu ataatsimeersuarnissaq

Naalakkersuisut siulittaasuat Hans Enoksen Namminersornerullutik Oqartussat pigisaani KNI-mi piginnittut, ulluinnarnilu aqutsisut immikkut ittumik ataatsimeersuarnissannik piumasaqaqqammerpoq. Sisimiunilu januaarip ulluisa 30-anni ataatsimeersuartoqassalluni.

Naalakkersuisut siulittaasuat ataatsimiinnermi oqalugiassangatinneqarpoq siulersuisullu siulittaasuannut KNI-imilu ulluinnarni aqutsisunut piumasaqarnissaa aamma ilimagineqarluni. Taakku saniatigut nutaamik siulersuisunik siulersuisullu siulittaasussaanik qinersisoqassaaq.

Siulersuisut aningaasarsiornermik, aqutseriaatsimik, aalisakkanik tunisassiornermik kiisalu angallassinermik pisinnaasaasa pitsanngorsarneqarnissaat piumasarisimallugu Hans Enoksen nittartakkamini allappoq.

Hans Enoksen januaarip ulluisa 16-anni tusagassiortunut nalunaarpoq piginnittut paasissutissanik pisariaqartitaannik KNI tunniusserusuttarsimanngimmat immikkut ittumik ataatsimeersuartoqarnissaa nammineq piumasarisimagini.

KNI naatsorsuutinik eqqortunik naammassineqarsimasunillu tunniussisarnissaa ilanngullugu piumasarisimagini nalunaarutigaattaaq.