KNI Pilersuisoq: Nioqqutissanut 300-nut aalajangersimasumik akikitsumik akeqartitsineq iluatitsilluarpoq
Nioqqutissanik ulluinnarsiutinik 300-nik “Aalajangersimasumik akikitsoq”imaluunniit ”Fast, lav pris” atorlugu aaqissuussineq, KNI Pilersuisup pisiniarfiini 65-ini pisisartut 22.000-it eqqaaneqartut akorluarpaat. Taamaasilluni aaqqissuussineq taanna, qaammatip ataatsip ingerlanerinnaani Kalaallit Nunaanni pisiniarfinnik ingerlatsiviit annersaanni, kaaviiaartitatigut 10,9 procentinik siuariarfiuvoq.
Taamatut paasissutissiivoq KNI-mi nioqqutissanik pisiniarnermut pilerisaarinermullu pisortaq Kurt Lauritsen. Aalajangersimasumik akikitsoq aqqutigalugu nioqqutissat tunineqarnerpaat tassaapput pastat, qaqorteqqasut kiisalu nioqqutissiat qillertuusarmiut, 24 procent-inik siuariarfiusut. Nioqqutissat pineqartut 300-t ilaat ”Aalajangersimasumik akikitsoq” avaqqullugu aammalu nalinginnaasumik pisiarineqartarnerannut naleqqiullugit, nanoq qernertoq nalunaaqutsiullugu ”Nannup Akigititai” – ”Isbjørnepriser” – ilisarnaasiullugit tuniniakkat, 45 procentit angullugit pisisartunut sipaartitsipput.
- Pilersaarummilu maannakkut atuuttumi, nioqqutissanik ulluinnarsiutinik taaneqartartunik pisinerminni, pisisartut katillugit ukiumut 10 procent-it angullugit sipaarutigissagaat, Kurt Lauritsen-ip oqaatigaa.
Nioqqutissat aaqqissuussinermi matumani tunisaanerpaat Kurt Lauritsenip tassaanerarpai ammassassuit ilaat plukmakrelinik taaneqartartut, qaqorteqqasut kinertuliassat kiisalu pizzat. Eqqaavinnut puussiat, equutissat kiisalu køkkenrullit aamma malinnaalluarput. Taakkua qorsunnik ilisarnaateqartitaallutillu akii qorsunngorlugit nalunaarsugaapput.
- Pisisartut nioqqutissanik ulluinnarsiutinik neqeroorutinik tamakkuninnga malittarinnittuarnissaat pisariaqanngilaq, taakkuami akii ukioq kaajallallugu pisiniarfinni tamani atuupput. Aaqqissuussineq ”Aalajangersimasumik akikitsoq” nunani allani pisiniarfiit misilittagaanneersuuvoq, Kurt Lauritsen oqaluttuarpoq.
- Suliniutigineqartoq KNI-p pilersaarutaani ”KNI 2016-imut”-ip ilagaa, ilaatigut nunaqarfinni illoqarfinnilu Pilersuisoqarfinni pisiniarfinni 65-iusuni akit pisisartunut iluaqutaasumik kinguneqarnissaat qularnaarniarneqartoq, suliffeqarfissuarmi pisortaaneq Claus Jensen oqarpoq. Ilaatigut danskit ulluinnarsiutinik nioqquteqarfianni iluatsilluarsimaqisumi Faktami Claus Jensen siusinnerusukkut pisortaaneruvoq. Clus Jensen, Kurt Lauritsen, nioqqutissanik pisiniartarfik, Pilersuisumi aqutsisut, niuertut pisiniarfiillu ittui peqatigalugit, maannakkut aaqqissuussinermik ineriartortitsineq ingerlanneqarpoq.
