KNI Pilersuisoq imermik tunisassiornissamut neriulluarpoq

Imermik tunisassiulersinnaaneq Qeqertarsuarmi aallartinniarlugu, KNI Pilersuisoq, SIK-p suliffissaqartitsiniarnermut aningaasaateqarfia kiisalu Qeqertarsuup kommunea suleqatigiinnissaminnik isumaqatigiissuteqarput.

KNI Pilersuisup pisortaata, Gerhardt Petersenip avataanit imermik tunisassiortut unammilleruminaassangatikkaluarlugit pilersinniagartik upperaa:

-Ukiut siuliinili suliassaq taanna pissanganartoq peqataaffigilersimavarput. KNI Pilersuisuisa aamma tapersersormassuk, uagullu suliffeqarfittut nalilimmik pilersitsisinnaanerput anersaarigatsigu peqataavugut, Gerhardt Petersen oqarpoq.

Avataaninngaanniit imermik tunisassiortut akitigut unammilleruminaassagaluartut, Qeqertarsuup imia pitsaasuummat avammut takoqqusaarutigilluassagatsik upperalugulu aamma oqaatigaa.

Siulersuisut ataatsimiinnerini, qanoq annertutigisumik aningaasaliissuteqarnissaminnik aalajangertoqarnissaa Gerhardt Petersernip aamma ilimaginerarpaa.

Imermik tunisassiulernissap ukiuni siullerni sinneqartoorfiusumik ingerlanissaa naatsorsuutiginngikkaluarlugu, imminut nammassinnaasumik ingerlalernissaa neriuutigalugu upperalugulu Gerhardt Petersen aamma oqarpoq.

Pilersaarutit maannatut isikkoqartillugit, inuit arfinillit arfineq-pingasullu akornanni sulisorineqassasut aamma oqaatigaa.

Suliffissanik pilersitsinissaq tapersersorlugu SIK-p suliffissaqartitsiniarnermut aningaasaateqarfia suliamut peqataasoq, siulittaasoq Jess G. Berthelsen oqarpoq.