KNI Partii Naleqqap apeqquteqaataanut akissuteqartoq
Suliffeqarfiup inuiaqatigiit pigisaata nioqqutissanik EU-mi nunani allani Danmarkimiinnaanngitsoq pisisinnaannginnersoq, ilaatigummi akikinnerusarmata, Naalakkersuisut siulittaasuata Kim Kielsenip Inatsisartut ukiaanerani ataatsimiinnissaannut atatillugu ammaanersiornermi oqalugiaataanut atatillugu oqallittoqarmat, Partii Naleqqap politikkikkut oqaaseqartuata Per Rosing-Petersenip apeqquteqaatigaa.
Nioqqutissat Nunatsinni tuniniagassat Danmarkip saniatigut EU-mi nunani aqqaneq-marlunni pisiarineqartartut, KNI-p Per Rosing-Petersenip isornartorsiuineranut akissuteqaammini ilaatigut oqaatigaa, erseqqissaatigalugulu nioqqutissat pisiarineqartartut pisinianut 23.000-inut naatsorsuussaasut.
Danmarkimi pisiniarfiup Føtexip ataatsip pisiarisartagaannut aamma naleqqiussisoqarpoq, tassa Nunatsinni pisisartut Føteximut ataatsimut naleqiullugu ikinnerummata, nioqqutissallu Nunatsinni akisunerunerannut patsisaasut ilaat aamma tassaammat nalunaaqutsersuisussaatitaanermik Nunatsinni inatsisip atuunnera, KNI allappoq.
Nioqqutissat nunani allani pisiarineqarnikut kalaallisut, qallunaatut qallunaalluunniit oqaasiinut eqqaanartunik allagartalersugaaneq ajornerat Nunatsinni akisunerunerannut aamma pissutaaqataasoq oqaatigineqarpoq, tassa nioqqutissat assersuutigalugu kalaallisut allagartalersugaanissaanut aningaasartuutit pissutaallutik akisunerusinnaasarlutik.
Akinut nunani allani atorneqartunut naapertuuttunik akilinnik pisisartut periarfissaqarnissaat KNI-mit sulissutigineqartuartoq KNI A/S-ip Per Rosing-Petersenip apeqqusiineranut ilaatigut aamma akissutigaat.
