KNI-p siulersuisuini ullumi taarsiisoqassaaq

KNI-p siulersuisuisa nalinginnaasumik ataatsimeersuarnerat ullumi nalunaaqutaq arfineq pingasunut aallartissaaq.
Allattoq Karsten Sommer, Simon Uldum
aggustip 26-at 2013 04:47

Tamanna Nuummi Hotel Hans Egedemi pissaaq, ataatsimeersuarnermilu siulersuisunut siulittaasoq Michael Skourup siulittaasullu tulli Vagn Andersen tunuassapput. Atuagadliutit AG sapaatit akunnerata siuliani taama allappoq.

Taakku suliffeqarfissuup siulersuisuini ukiuni arlalinni ilaasortaasimapput, suliffeqarfiullu 2006-imi koruuninik 250 millioninik amigartooruteqarluni ingerlanerliornerani aningaasaqarnerup pitsanngortinniarnissaanut suleqataasimallutik.

KNI-p siulersuisuini qullersat marluk tunuartinneqarnissaat e-mailimi - Aleqa Hammondip naalakkersuisoqarfianut nassiunneqartumi - atuarneqarsinnaasimavoq, siulersuisunullu ilaasortat tunuartitaanissaminnik toqqaannartumik nalunaarfigineqarsimanatik.

- Paasissutissat taama ittut e-mailip kopiiani atuartussanngorlugit periaaseqartoqarnera eqqumiippoq, aamma sumik tunngaveqarnersoq nalunarpoq, Vagn Andersen AG-mut oqarpoq.

KNI-p siulersuisuini siulittaasup Michael Skourupip aviisimut aamma uppernarsarpaa e-mailip kopiiatigut aatsaat paasisimallugu.

- Soorunami ajuusaarpunga, Michael Skourup tunuartitaanissi pillugu naatsumik oqarpoq.

AG-p paasissutissaatai naapertorlugit, KNI-p siulersuisortaassai Islandimiumit inuussutissarsiutinik ingerlataqartumit Halibutimilu pisortamit Niels Thomsenimit siuttuuffigineqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq