KNI-p pisiniarfia Københavnimiittoq ukiumut 1 miliuuninik amigartoortarpoq
KNI-p Københavnimi immikkoortortaata ukiup naanerani matuneqarnissaa pillugu Kuupik Kleistip apeqqutaanut Naalakkersuisut siulittaasuat Hans Enoksen akissummini taama oqarpoq.
Naalakkersuisulli kalaallit nunani allaniittut allatut periuseqarluni pilersorneqarsinnaanerat innersuussutigaat, soorlu Københavnimi peqatigiiffeeraqarpoq KNI-p pisiniarfianut atasumik.
Peqatigiiffeeraq kalaaliminernik, ilaatigut nunat tamat isumaqatigiissusiaat malillugit illersorneqartumik, malittarisassat immikkut ittut malillugit iluanaarutaanngitsumik tuniniaasarpoq. KNI-p peqatigiiffeeqqap ingerlaqqinnissaa neriorsuutiginikuuaa, soorlu Danmarkimi kalaallit illui suleqatigalugit.
KNI A/S Københavnimi ukiumut 1 miliuuni koruuninik amigartoortarpoq. Pisiniarfik maanna tuniniarneqarpoq, KNI-lu nalunaarpoq pisinissamut soqutiginnittunit saaffigineqartareerlutik.
