KNI-p NUKA-mik tigusinera iluaqutaassangatinneqarpoq
NUKA A/S-ip tiguneqarnera KNI-ip ingerlatsinermut aningaasartuutaanut iluaqusiingaatsiassaaq.
- KNI-p ukioq manna million koruunit sipaarsinnaassavai, pisortaaneq Gerhardt Petersen naliliivoq.
KNI-p Sisimiuni ippassaq ataatsimeersuarnerani Naalakkersuisut nalunaarutigaat, KNI-p NUKA-mik tigusineratigut ingerlatsiviit ingerlanneqarnerisa akikinnerulernissaat naatsorsuutigalugu.
- Aamma taamaassaaq. Gerhardt Petersen erseqqissaavoq.
Sipaarniarnermut pissutaatinneqarpoq, suliffeqarfimmi pisortaqatigiinnut siulersuisunullu ilaasortanut aningaasartuutit ikinnerulernissaat kiisalu KNI-p suliassat assigiinngitsut NUKA-p nammineerluni siornatigut suliarisarsimasai KNI-mit tiguneqartussanngornerat. Assersuutigalugu aningaasaqarnermut qarasaasiaqarnermullu tunngasut aamma illut ataatsimoorluni atorneqalernerat sipaarutaasinnaasutut nalilerneqarput.
KNI siorna katillugit 58 million koruuninik sinneqartoorpoq, kaaviiaartitat 1,6 milliard koruuniullutik.