KNI-p kiffartuussinini nalilersoqqinniarpaa

- Pingaartumik nunaqarfinni arlalinni niuertarfiit nioqqutissaatikinnerulernerannik niuertarfiillu ammasarnerisa sivikinnerulerneranik kinguneqassasoq, Frederik Olsen KNI-mi tusagassiisartoq oqarpoq.

- Siunertaraarput sullissinerup nioqqutissaqarniarnikkullu killiffiup pitsaassuatalu nalilersornissaa. Pingaartumik atuisut sulisullu tikillugit paasiniaaneq isummersuinerlu ingerlakkitsik, Frederik Olsen oqarpoq.

Kiffartuussinermut isumaqatigiissutit ukiumut siornagut 90 millioni koruuninik naleqartoq, ukiormanna 45,1 millioni koruuninngorpoq. Inatsisartut aningaasanut inatsisaanni takuneqarsinnaalereerpoq, ukiuni aggersuni aamma appariartuinnassasoq.

- Soorunami sunniuteqassapput. Sullissinerput ajorseriarsinnaavoq. Aamma nioqqutissanik pilersuinermut Namminersornerullutik Oqartussanut isumaqatigiissut aallaavigalugu nalimmassaanissaq eqqarsaatigineqalereerpoq.

- Taamaattumik nioqqutissat suut nunaqarfinni pisiniarfinni pigineqartariaqarneranut atatillugu isumaqatigiissut maleqqissaarlugu minnerpaaffimmiititsissaasut, Frederik Olsen oqarpoq.

Ammasarfiit aamma minnerpaaffilerneqarnissaat periarfissaanerarpaa.

- Nunaqariit akilersinnaanngitsut ingerlanneqartut aningaasartuutaanerisa minnerpaaffimmiitilersinnaanerat eqqartorparput, oqarpoq.

Kisianni nunaqarfiit minnerit matuneqarsinnaanerat KNI-mit aalajangerneqarneq ajorpoq.

- Innuttaasut kisimik matusisinnaammata. KNI taamaallaat pisiniarfeqarnikkut nalimmassaasarpoq, assersuutigalugu Moriusaq (Qaanaap kommuneaniittoq, aaqq.) qulit missaannik maanna inulik pisiniarfeqarpoq sivikitsunnguamik ammatinneqartartumik.

Namminersornerullutik Oqartussat sumiiffinni aalajangersimasuni pisiniarfiit aalajangersimasumik nioqqutissaateqarlutik ammatinnissaannut KNI-mut kiffartuussinermik isumaqatigiissuteqartarput.

- Akiliisarput Pilersuisup niuertarfia ammatinniassagutsigu, Frederik Olsen naggasiivoq.