KNI nutaanik siulersuisoqalissaaq
KNI-p siulersuisuisa nutaanik taarserneqarnissaat naalakkersuisut ullumi aalajangerpaat, tamanna pissaaq immikkut ataatsimeersuartitsinikkut.
Naalakkersuisut taama aalajangernerminnut atatillugu piumasaqaatigaat, suliffeqarfinni Namminersornerullutik Oqartussani pigineqartuni, piginnittut piumasaqaataat tunngavigalugit siulersuisut ingerlatsissasut.
Naalakkersuisut siulittaasuat Hans Enoksen ualimut ima oqarpoq:
- Massakkut naatsorsuutinut tunngasut sukumiisumik qulaajarneqarnissaat aammalu nutaamik aaqqissuussineq, nunaqarfinnik kiffartuussineq, ilaasunik angallassineq, tunisassiorneq tamakkua tamarmik naatsorsuutaasa erseqqissumik inissinneqarnissaat suliareqqullugit saaffiginnittarnikuuvugut marloriarluta, ajoraluartumillu sukumiisumik tamakku naammassineqarsimanngillat. Taamaammat aamma uanga pisussaaffigaara, qularnaatsumik tamakku naammassineqarnissaat aamma nakkutigissallugu piginnittut sinnerlugit, Hans Enoksen radioaviisimut taama oqarpoq.
Taanna aperineqarpoq, marloriarlugu KNI naammassisaqarnissaanut piumaffigineqartaraluarluni iliuuseqartarsimannginnera sumik peqquteqarsorisimaneraa.
- Taanna soorunami siulersuisut akisinnaasariaqarpaat, uagut siulersuisunut apuussisaqareernikuuvugut qularnanngilarlu taanna akunnerminni suliassaq sukumiisumik ingerlassimanngikkaat, taamaammat piginnittut qullersaattut uanga tassa piumasaqarpunga piaarnerpaamik taanna naammassineqarlunilu immikkut ittumik ataatsimeersuartoqartariaqartoq, Hans Enoksen oqarpoq.
Nunaqarfinnik kiffartuussinermi naatsorsuutit pingaartumik takujumaneqalerput.
Hans Enoksenilu nangippoq:
- 50 millionit sinnerlugit massakkut akiliuteqartarpugut, ukiuni tulliuttuni appartikkiartorneqartussanik, aammalu nunaqarfiit ilaatigut imminut akilersinnaanngitsutut nalilersorneqartarput, taamaammat tamakku sukumiisumik paasiniarlugit erseqqissumik takussutissaqalersinniarlugit nunaqarfinnut kiffartuussinermi akiliutigineqartartut tunngavigalugit nunaqarfinnut naatsorsuutit immikkoortinneqarnissaat taanna sukumiisumik tamakkiisumillu aamma piumasariniarparput, aamma siornatigut tamanna piumasarereernikuugaluarparput kisianni maannakkumut naammassineqanngilaq, Hans Enoksen naggasiivoq.
Naalakkersuisut siulittaasuat Hans Enoksen ulluni makkunani Ilulissaniippoq. Immikkut ittumik ataatsimeersuarneq januaarip naanerani februaarillu aallartilaarnerani pissaaq.
