KNI: Nunaqarfimmiut ernumassutissaqanngillat

KNI amigartooruteqaraluartoq nunaqarfinni minnerusuniittut ernumassutissaqanngillat, taama oqarpoq KNI-p pisortaanera Gerhardt Petersen:

-Nalinginnaasumik ingerlatsinermi angusarineqartut ajorisassaanngillat. Amigartooruteqarnermut nalikilliliinerit annertuut pissutaaqataapput, akileraarutitigullu ilanngaatip ilanngunneqarsimanera pissutaaqataavoq. Politïkkimut tunngasortaa oqaaseqarfigissanngilara erseqqissaatigissavarali nunaqarfinni minnerusuni soraarsitsiortortoqarnissaanik matooraasoqarnissaanillu oqartoqarnikuunngitsoq. Eqqartorsimavara nunaqarfinni naleqqussaasariaqartugut. Taassuma imaraa nunaqarfinni AGF-eqarfiusuni uagullu niuertoqarfigisatsinni suliassanik, akikinnerusumik ingerlatsinissaq siunertaralugu kattussuutsitsisinnaaneq. Kattussuutsitsinermi pisariaqanngitsumik sulisitsineq eqqumaffigineqassaaq niuertullu atorfinitsitsisarnermut soraarsitsisarnermullu annerusumik akisussaafeqalissapput, aalisagaqarneq tunisassiaqarnerlu tunngavigalugit, taamaattumik nunaqarfimmiut ernumassutissaqanngitsut Gerhardt Petersen erseqqissaavoq. Erseqqissaatigaattaq KNI-mik aqutsisut amigartooruteqarnermut akisussaasuusut. KNI-p pisortaanera Gerhardt Petersen oqarportaaq, suliffeqarfissuup amigartooruteqarneranik Naalakkersuisut misissuititsissappata tamanna akornutissaqartinneqassanngitsoq.