KNI namminersortunngorsarniarpaat
Kangaatsiami ornigarneqarluartumik innuttaasunik ataatsimiisitsineq alloriarnerit siullersaraat, tassani allannguinissat pillugit innuttaasut tusarniarneqarlutik.
Suleqatigiissitamik, namminersortunngortitsinissamut periarfissanik misissuisussanik pilersitsisoqarpoq, tusagassiinermullu pisortap, Frederik Olsenip, suliassat ima oqaluttuarai:
- Aqqut takissaqaaq unammilligassallu imaannaanavianngillat, ilaatigut nunaqarfinni isorliunerusunilu aningaasarsiornerput ilungersunarsinnaasarmat, taamaattumik akilersinnaasumik niuerpalaartumillu ingerlatsinissaq anguniagassaavoq imaannaanngitsoq, Frederik Olsen oqarpoq nangillunilu:
- Nunaqarfinni isorliunerusunilu aningaasarsiorneq nunatta sinneranisut ineriartunngilaq. Ilaatigullu aningaasarsiorneq appariartorpoq. Taamaattumik nunaqarfinni isorliunerusunilu namminersortungorsaassagaanni imaannaanngilaq, Frederik Olsen oqarpoq.
Pisortaanerup, Søren Lennert Mortensenip, Kangaatsiarmiunik suleqatiginnilluarneq nuannaarutigaa. Taanna Radioaviisimut oqarpoq, KNI A/S-ip aaqqissuussaanerata siunissami qaninnermi allanngortinnissaa siunertaasoq. Siunissami ungasinnerusumi piginneqatigeeriaaseq sorleq KNI A/S-imut soqutiginarnerunersoq misissorneqassaaq.
