KNI A/S-imut 2007-imi ukiup affaanut siullermut angusaq 75 million koruuninik amigartoornermit ajornerujussuusinnaavoq.
KNI A/S-p aningaasarliornera pisortamik siulersuisunilu ilaasortanik soraarsitsinermik kinguneqareerpoq.
Taama allappoq naalakkersuisut siulittaasuat Hans Enoksen Atassutip inatsisartuni ilaasortaanut akissuteqaammini.
Suliffeqarfissuup aaqqissuuteqqinnissaanut tunngatillugu annikinngitsunik ataasiartamik aningasartuutinik 2006-imi naatsorsuutit oqimaarsaatigisassaannik kinguneqassasoq, naalakkersuisut siulittaasuat aamma allappoq.
- Nalilerneqarsinnaavoq 2006-imi ajornerpaamik pisoqassappat amigartoorutit 200-niit 250 million koruunit angullugit annertussuseqarsinnaanerat, akissummi allassimavoq.
KNI-mi ulluinnarni aqutsisuulersut ingerlatseqatigiit immikkoortutut ingerlanneqartut peerneqassanersut amigartoorutit qanoq amerlatiginissaannut apeqqutaassaaq.
Sullissinermut akornusiissanersoq aperineqarami, Hans Enoksen akivoq:
- Amigartoorutit KNI A/S-ip angusarisassaatut ilimagineqartut kinguneqanngitsoornavianngillat, aamma ingerlatseqatigiiffissuup suliassaqarfiinut pingaarnernut, kisiannili KNI-p qullersaqarfiani ulapputtoqarpoq suliassaqarfinnut pingaarnernut sunniutaajumaartut sapinngisamik annikinnerpaaffissaminiitinniarlugit. Naalakkersuisut siulittaasuat akivoq, nangillunilu.
- Naalakkersuisulli suliassaqarfinni pingaarnerni ingerlatsineq malinnaaffiginiarpaat, ilaatigut sullissinerup pitsaassusissaata isumannaarneqarnissaa, kiffartuussinissamut isumaqatigiissummi allaaserineqartup eqqortinneqarnissaa eqqarsaatigalugu, neriorsuivoq.