Demokraatit maanna paaserusuppaat KNI-mi pisortamik soraarsitsisoqarnera naalakkersuisunit qanoq isumaqarfigineqarnersoq.
Naatsorsuutinimmi amigartoorujussuarnerup kinguneraa KNI-p umiarsuaateqarfiata pisortaata Søren Bjerregård Jensenip soraarsitaanera. – ilaatigut amigartoornermut tunngavilersuutiginiarneqarluni Uummannami qaatsiartaatip iluatsinngitsup aningaasartuutaavallaarsimanera. Soraarsitsinerlu tamanna Demokraatit naammaginngilaat.
- 2004-mi kalaallinik Tuluit Nunaannukartitsisoqarpoq qaatsiartaatit qimerlooriartorlugit, taakkununngalu ilaavoq Pilersuisup pisortaa Gerhardt Petersen, kingorna Gerhardt Petersen nalunaaruteqarpoq, qaatsiartaat pilerinarnerpaatillugu, Demokraatit allapput.
Gerhardt Petersenip oqaaserisimasaa allakkiaminni ima issuarpaat:
- Qaatsiartaatip atorneratigut Uummannami suliassarput akikinniararsuarmik pitsaanerujussuarmillu naammassineqarsinnaavoq.
Demokraatit naalakkersuisunut apeqquteqaamminni paasinerusuppaat, qaatsiartaatip pisiarineranut kina pingaarnerpaatut akisussaasuunersoq. Taakuttaaq paaserusuppaat, naalakkersuisut naapertuilluarsorineraat KNI-p qaatsiartaatip iluatsinnginneranut Søren Bjerregaard Jensenip kisimi pisuutitaanera.
Aamma paaserusuppaat Uummannap kangerluani kiffartuussinermut atatillugu Namminersornerullutik Oqartussat sullissinermi isumaqatigiissutiliaani kina pingaarnertut akisussaassuutinneqarnersoq. –
Demokraatinit aamma apeqqutigineqarpoq KNI-p umiarsuaateqarfiata pisortartaava qanoq piukkunnartiginersoq.