KNI-mi siulersuisut Demokraatinit uparuarneqarput

KNI-mi siulersuisut nutaat katiterneri pillugit Demokraatineersoq Palle Christiansen isorinnittunut arlaqalereersunut ilannguppoq.

KNI-p siulersuisuisa nutaat katiterneri pillugit inatsisartut suleriaasianni paragraf 36 naapertorlugu Palle Christiansen assigiinngitsunik apeqquteqaateqarpoq. Tassalu imaalerpoq, illuatungiliuttut naammagittaalliuutaat pillugit Naalakkersuisut siulittaasuat Hans Enoksen pisortatigoortumik akissuteqartariaqalerpoq.

Simon Olsenip aamma Aqqalukasik Kanuthsenip siulersuisunnut ilanngunnerminni KNI-mut tunniussinnaasaminnik qanoq ittunik piginnaasaqarnersut apeqqutinut ilaavoq.

- Ilinniagaqarsimaneq eqqarsaatigissagaanni taakku marluk piginnaaneqarsorinngilakka. Siulersuisunut qinigaanerannut pissutaavoq Naalakkersuisut siulittaasuat kammalaatigigamikku, Demokraatineersoq Palle Christiansen oqarpoq.

- Pingaarutilinnik oqimaatsunillu suliassaqarfiusut inuttassarsiorneqaleraangata siunnersuisarfiit nunani allani atorneqartarput, KNI A/S-ip siulersuisussaanik katiterinialeramik Naalakkersuisut aamma taamaaliorsimassagaluarput, Palle Christiansen oqarpoq.

Marsip ulluisa pingajuat nallertinnagu akineqarnissi Demokraatineersup kissaatigaa.