KNI isumaqatigiissut pillugu isumalluarpoq

Nunaqarfinni nioqqutissat akikinnerulernissaat naalakkersuisut siulittaasuata Hans Enoksen-ip Ilulissani Siumut ataatsimeersuarnermi piumasaraa.

Nunaqarfinni nioqqutissat akiisa appartinniarneqarnissaat anguniarlugu kiffartuussinermut isumaqatigiissut naalakkersuisut eqqarsaatigeqqissagaat KNI-p pisortaata Søren Lennert Mortensen-ip ulluni makkunani Danmarkimiittup, tusarsimalerpaa.

- Isumaqarpunga suliassaq pissanganarluinnartoq. Taamaattoqassappalli kiffartuussinermut isumaqatigiissut nutarterneqartariaqarpoq nunattalu karsianiit aningaasaliissutit ilaneqartariaqassallutik, Søren Lennert Mortensen radioaviisimut oqarpoq.

Nunaqarfinni nioqqutissat pinngitsoorneqarsinnaanngitsut akisuallaarnerinik Naalakkersuisut siulittaasuata Hans Enoksenip oqarnera inuttut misigisaanik aallaaveqartoq Sermitsiami allaaserineqarpoq.

Siorna nunaqarfimmini Itillimi juullisioriartilluni Pilersuisumi iffiamik iffiamillu qaqortumik 50 koruunilerlugit pisinini akisunaarsimavai, Nuummimi pissutsit taamaanngimmata.

Nunaqarfinni inuussutissat pinngitsoorneqarsinnaanngitsut akiisa appartinneqassaannut kiffartuussinermut isumaqatigiissutip atorneqarnissaa KNI-p ataatsimeersuarnerani piumasarissavarput. KNI-mut tapiissutit 50 million koruunit missaaniittut ingerlatsinermut allaffinnilluunniit allilerinernut atorneqartussaanngillat, naalakkersuisut siulittaasuat Sermitsiamut oqarpoq.

Kiffartuussinermut isumaqatigiissut maanna atuuttoq naappertuuttumik ingerlanneqartoq KNI-p pisortaa radioavisimut oqaatigaa.

-Illoqarfinni nunaqarfinnilu nioqqutissat akiisa assigiinngissutaat ukiumut marloriarluni uuttortarneqartartoq, isumaqatigiissutaareersumit annikinneruvoq, Søren Lennert Mortensen oqarpoq. Taamaattumik naalakkersuisut siulittaasuata oqaaserisai isornartorsiutitut isiginngilai.

Kiffartuussinermut isumaqatigiissummut aningaasat 50 millionit koruunit

Namminersornerullutik oqartussanit tapiissutitaasarput.