KNI A/S-imi siulittaasunngortoq illuatungilerneqarpoq
KNI A/S-imi siulersuisussat inissipput. Siulersuisunilu siulittaasunngortitaavoq Simon Olsen.
Simon Olsen 2004-imi Aalisarnermut Piniarnermullu naalakkersuisuuvoq. 2004-mi novembarip qaammataani Naalakkersuisut siulittaasuannit Hans Enoksenimit peqquneqarpoq Simon Olsen Naalakkersuisutut tunuarniuteqanngikkuni tunuartitaasariaqartoq. Taamanikkut taama aalajangertoqarneranut tunngaviuvoq, kukkunersiuisut paasisaat naapertorlugu aningaasatigut naapertuutinngitsumik pisoqarsimammat.
Kattusseqatigiit Partiiata siulittaasua Anthon Frederiksen tamanna pillugu oqarpoq, inuit peersitaariarlutik qullinngortillugit inissinneqartarnerat nunatsinni nalinginnaalluinnalersimasoq.
- Aappaatigut tupigisariaqanngilarluunniit naluneqanngitsutut pingaartumik partiip Siumup ilumini politikerit politikeritoqanngortullu ilaatigut aamma qinigaaqqinngitsoortut imaluunniit kasiiligaasut politikimanngaanniit inissittarpai atorfinnut qulliunerpaat ilaannut. Taanna nalinginnanngorsimavoq ukiuni kingullerni pingaartumik namminersornerulernerup kingorna, isumaqarpungalu tamanna pissuseq inuiaqatigiit ingerlanneqarnerani isornartuusoq kusanaranilu, Anthon Frederiksen oqarpoq.
Anthon Frederiksen nangilluni oqarpoq, inuusuttut ilinniarluarsimasut amerlaqisut siulersuisunut inissinneqartannginneri uggornartuusoq.
- Simon Olsenip inuttaa minnerpaamilluunniit apeqqusernianngilara, kisianni maannakkut Kalaallit Nunatsinni inuusuttut ilinniagartuut amerlagaluttuinnarput qujanartumik aammalu pikkorissorpassuarnik peqarpugut, taamaattunik bestyrelsenik ingerlatsilluarsinnaasunik, taamaammat kammalaatigiiaarluni taamannak kammalaatinik inissiisarneq isumaqarpunga kalaallit inuiaqatigiit politikkikkut ingerlanneqarneranni peqqinnanngitsuusoq. Pingaartumik inuusuttortagut aammalu pikkorissut atorluassagutsigit tamakkua ilinniagaqarluarsimasut atorfinni taamaattuni issiatinneqartariaqarput, kammalaatiunngitsut aamma parteeqatiunngitsut.
Anthon Frederiksen imaattumik aamma assersuuteqarpoq.
- Ungasittorsuunngitsukkut ukiarmi takuarput Jens Napaattooq Naalakkersuisuni tunuartitaammat aamma qangaammalli KNI-mi sinerissami pisiniarfinni ittunngortinneqareerpoq, pissutsit taamaattut kusananngillat, Anthon Frederiksen oqarpoq.
Taanna aamma oqarpoq, tamanna aaqqinneqassappat naalakkersuisut tamatuminnga eqqaasinneqartuartariaqartut aammalu tamanna Inatsisartuni oqaluuserineqarsinnaasoq, apeqqutaallunili nukiit tamatumunnga sammisut soqutigineqarluarnersut.
