KNI GA-mut ilaasortanngoqqippoq

KNI GA-mit 2004-mi ilaasortaajunnaarpoq, 2006-imilu Nunaqavissut Suliffiutillit Kattuffiannut Nusukamut ilaasortanngorluni. Ukiuilli marluk qaangiutiinnartut Nusukamit anivoq, pissutigalugulu sullinneqarnertik ilaasortaanermut akiliutiminnut naapertuussorinnginnamikku. Taamanikkorniillu Peqatigiifimmut Kattuffimmulluunniit ilaasortaasimanngilaq.

Maannali tassa GA-mut ilaasortaalersut ukiuni kingullerni marlussunni amerliartoqqilersimasut, KNI ilagilerpaat.

- Tassunga arlallit pissutaapput, KNI-p pisortaanera Søren Lennert Mortensen oqaluttuarpoq, nangillunilu:

- Pingaartumik inuussutissarsiutit immikkoortuanni pisiniarfiit aamma amerlasuunngorlugit nioqquteqartarfiit pillugit sulinermi suleqatigiinnissaq atassuteqarfigisartakkalu amerlinissaat pisariaqartipparput. Pingaarnertut pilersuisorput aqqutigalugu Qallunaat Nunaanni niuertarfinnik sulineq pillugu atassuteqalernissamik misiliinikuuvugut, ilaatigut tamanna aqqutigalugu inuussutissarsiutit immikkoortuanni ineriartornermik, naatsorsueqqissaarinernik, pisisartut ileqquinik il.il. paasisaqarusulluta. Tamanna uagutsinnut naammaginartumik kinguneqanngilaq, taamaammallu nunami maani niuertarfiutilinnik suliat pillugit attaveqalernissarput neriuutigaarput, naak sumiiffinni ataasiakkaani unammilleqatigiikkaluarluta. Ilimagaarpullu GA-mi attaveqaatit Qallunaallu Nunaanni kattuffiit aqqutigalugit attaveqarfigisartakkagut aamma amerliumaartut, Søren Lennert Mortensen oqarpoq.

Ikummatissanik orsussamillu nioqquteqartarfik Polaroil eqqarsaatigalugu eqqortunik attaveqartarnissaq aamma KNI-p pingaartippaa, taamaalilluni aatsitassanik misissuineq aatsitassarsiornerlu KNI-p nukittorsarsinnaammagu.

Sulisitsisut Peqatigiiffiannut ilaasortanngornermikkut KNI-p niuerfinni allani pissarseqataanissaq qulakkeerneqassasoq oqaatigineqarpoq.

- Nassuerutigisariaqarparput Sulisitsisut Peqatigiiffiannut ingerlalluartumut ilaasortaaneq KNI-mut iluaqutaassammat, minnerunngitsumik maannakkut inissisimanerput tunngavigalugu, oqarpoq, innersuussutigalugu maanna suliffeqarfimmi nutarterinertik pisariillisaanertillu.

GA-mi ilaasortaaneq aamma paasissutissanik paarlaasseqatigiittarnissamik, pikkorissartitsinernik, nunani tamani attaveqarfinnik allarpassuarnilu pissarsiviusussaasoq suleqatigiilersut qularinngilaat.

- Kattuffimmi suliamik pisinnaasaqarfiulluartumi peqataanissarput qilanaaraarput, tassa “puugutoq itisooq” tamatigut nammineq nassaareqqittariaqartassannginnatsigu, KNI-p Pisortaa Søren Lennert Mortensen aamma GA-mi pisortaq Henrik Leth oqarput.

GA-mi ilaasortaapput suliffeqarfiit 500-t 8.000-t missaannik sulisullit. Namminersorlutik Oqartussat pigisaat niuernermi suliffeqarfissuaq KNI inuussutissarsiortut allat kattuffiannut anginerpaamut ilannguppoq.