KNI ataatsimeersualerpoq

KNI-p piginnittuata tassalu Namminersornerullutik Oqartussaasut decembarip sisamaanni immikkut ittumik ataatsimeersuartitsinissaani KNI-mi siulersuisut taarserneqartussanngortut. Else Olsvig paasissutissiissaaq:

- Kisitsisilerillaqqissunik siulersuisortaartariaqarpugut. KNI suliffeqarfimmut aqutsillaqqissunik siulersuisoqartariaqarpoq, Naalakkersuisut siulittaasuat Hans Enoksen oqarpoq.

Ukioq manna ukiup affaani siullermi KNI A/S 75 millioni koruuninik amigartooruteqarpoq. Tamanna immikkut ittumik ataatsimeersuartitsisoqarnissaanut tunngaviulluarsinnaavoq, Naalakkersuisullumi siulittaasuat oqareerpoq KNI kisitsillaqqissunik aqutsillaqqissunillu siulersuisoqartariaqartoq.

Avisimi Sermitsiami allaaserineqarpoq danskeq inuussutissarsiornermik suliaqartoq Vagn Andersen KNI-mi iluarsartuussisussanngortitaasussanngorunartoq. Vagn Andersen Arctic Umiaq Linemi pissutsinik qaammatip ataatsip matuma aamma iluarsartuussitinneqartoq, oqaaseqartissinnaasimanngilarput. Taamatuttaaq KNI-mi 1000-it sinnerlugit sinerissami sulisoqartumi ukiumullu aningaasanik 2 milliarder koruuninik kaaviaartitsisartumi siulersuisuni siulittaasoq Simon Olsen, immikkut ittumik ataatsimeersuariaqqusineq pillugu oqaaseqartissinnaasimanngilarput.

Naalakkersuisut siulittaasuat Hans Enoksen KNI pillugu suliat maanna ingerlatillugit aamma itinerusumik oqaaseqarsinnaanngikkallarnerarpoq.

Simon Olsenip KNI-mi siulersuisuunerata nalaani allanngortitsinerit assigiinngitsut pipput. Nuka A/S tiguneqarpoq, Arctic Green Food nunaqarfinnullu Assartuivik pilersinneqarlutik. Assartuivimmullu atatillugu; tyskit umiarsuaannik attartorniarnermi kalaallillu sulisut Polenimiunik taarserneqarnissaat saqqummermat, Simon Olsen Naalakkersuisut siulittaasuannit aamma isorineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat