KNI aamma Greenland Venture Sisimiuni isumaqatigiinniarput
Sisimiuni tunitsiviit Arctic Green Foodimit ingerlanneqartut sinnerisa qanoq pineqarnissaat pillugu KNI Greenland Venturelu ulluni makkunani isumaqatiginninniarput.
Qaanaami, Savissivimmi, Ikamiuni, Attumi, Napasumi, Qassimiuni aammalu Narsarmiuni Illoqqortoormiunilu tunitsiviit siunissami qanoq inissisimassanersut pillugit ulluni makkunani Greenland Venture kiisalu KNI isumaqatiginninnialeruttorput.
KNImi siulittaasoq Simon Olsen aperaarput isumaqatiginninniarneq qanoq sivisutigissanersoq imalu akivoq:
- Immaqa taanna siulliit sivitsuloorutat eqqarsaatigalugit sivisussanngitsoq naatsorsuutigaarput majip naannginnerani tamarmi naammassisimassasoq.
Tunitsiviit taaneqareersut saniatigut Kangerlussuarmi Umimmannik tunisassiortarnerit kiisalu Maniitsumi arferit tunisassiarinissaannut sullivik, Maniitsoq Hvallinien, aamma isumaqatiginniutaasut,
Simon Olsen KNR-imut nassuiaateqarpoq.
Greenland Venture qularutissaanngitsumik tunitsiviit Royal Greenlandimit ingerlanneqalinngitsunit akisussaasunngussasoq oqaatigineqarsinnaanersoq apeqqutigigatsigu Simon Olsen ima oqarpoq:
Taanna massakkumut ilippanarnersaavoq takusinnaasagut malillugit taamaammat taanna suliassinneqarnerput malillugu piukkunnartutut aammalu pissusissamisoortutut isigalugu massakkut aap saapparput, aap.
Simon Olsenip erseqqissaatigaa Arctic Green Foodtip tunitsiviit ingerlassimasai Royal Greenlandimit akisussaaffigineqalinngitsut pillugit soqutiginnittut tamaasa oqaloqatigereersimallugit saaffiginnissutaannilluunniit akissuteqarfigisareersimallugit.
Greenland Venturemi pisortaq Jørgen Wæver Johansen oqarpoq isumaqatiginninniarneq ingerlatillugu oqaaseqarniarnatik siulersuisutillu inaarutaasumik ilisimatinneqaqqaartinnagit tunitsivinnik ingerlatsilernissaq pillugu tusagassiuutinut oqaaseqarnavianngikkallarlutik.
