KNI 75 millioni koruuninik amigartooruteqarpoq

Allattoq Mads Lynge
septembarip 22-at 2006 08:38

KNI A/S-ip 2006-ip qaammataanut siullernut arfinilinnut naatsorsuutai saqqummiunneqaqqammerput. Tassani takuneqarsinnaavoq 75 millioni koruuninik anigartooruteqartoq.

Arctic Green Food-ip aningaasartuutaasa matussuserneqarnerat KNI-p amigartooruteqarneranut pissutaaqataavoq, 28 millioni koruuninik ukioq manna qaammatini siullerni arfinilinni amigartooruteqarmat.

KNI-p umiarsuaateqarfia Assartuivik amigartoorutinut aamma pissutaaqataavoq. Uummannami qaatsiartaatit ilimagisamit 6 millioni koruuningajannik aningaasartuutaanerusimapput.

Amigartoorutit sinnerisa suliffeqarfimmi nalikilliliinernut tutsinneqarput, akiitsukkanik isumakkeerinninnerit pissutaatinneqarlutik.