KNI 58 million koruuninik sinneqartoorpoq

KNI-p siulersuisui pisortaalu Sisimiuni qullersaqarfimminni ullumi ataatsimeersuarput, siornalu 58 mio koruuninik sinneqartooruteqarsimapput akileraarutit pinnagit.

KNI A/S-ip 58 mio koruuninik sinneqartoorneranut pissutaavoq, nunarsuarmi olie-p akiata qaffannera Namminersornerullutillu Oqartussat kiffartuussinermik isumaqatigiissuteqartarnerat.

Siorna aasakkut olie-p benzin-allu akiat liiterimut 12 øre-mik qaffanneqarpoq, nunarsuarmi olie-p qaffannerata kingorna. Tamannalu ikummatissaqarfiup 41 mio koruuninik sinneqartooruteqarneranik peqquteqarpoq. 2003-mut sanilliullugu sinneqartoorut 12 mio. koruuninik anneruvoq. Ikummatissaqarfik milliard-it affaanik kaaviiaartitaqarpoq.

Nunaqarfinnut nioqqutissanik pilersuinermi sinneqartoorutit annikinnerupput. Tuniniaanermik immikkoortortaqarfik akileraarutit pinnagit, katillugu 17,3 mio koruuninik sinneqartooruteqarpoq. 2003-mit syv mio. koruuninik annikinnerulluni. Tuniniaanermi immikkoortortaqarfik 1 milliard-inik kaaviiaartitaqarpoq.

KNI nunaqarfinnut nioqqutissanik tunisinerulersimavoq, immiaaqqanilli sodavandinillu tunisinerat annikinnerulersimalluni, tamanna sinneqartoornerup annikinneranik peqquteqarpoq, kaaviiaartitat annertugaluartut.

Inuiaqatigiinni ingerlanerliortoqarneranik kisitsisit annikinnerunerannut peqquteqarpoq, KNI-milu pisortat ilimagisaannit aamma annikinneruvoq.

Namminersornerullutik Oqartussat 56 million koruuninik nunaqarfiit kiffartuunneqarnerannut tapiissuteqarsimapput, aningaasallu taakku atorlugit Pilersuisoq nunaqarfinni ingerlatsisinnaasimalluni.

Sinneqartoorutit ilaat 21 million koruunit Namminersornerullutik Oqartussat iluanaarutigissavaat. KNI-p pisortaanera aamma siorna ukiumut katillugit 3,3 million koruuninik aningaasarsiaqarsimavoq.