KNI 244,9 millioni koruuninik siorna amigartooruteqarpoq

KNI-p 2006-imut ukiumoortumik naatsorsuutai atuarlugit nuannerpallaarunanngillat, sapaatilli akunnerup naanerani oqaluuserineqarput akuersissutigineqarlutillu.

Akileraarutit peernagit 244,9 millioni koruuninik amigartooruteqartoqarpoq.

KNI-p suliffeqarfiutai Assartuivik aamma Arctic Green Food amigartoornermut pissutaaqataalluinnarput, Assartuivik 88,4 millioni koruuninik, Arctic Green Foodilu 47,4 millioni koruuninik amigartoorfiusimammata.

Assartuiviup suliai Royal Arctic Line A/S-imit ukioq manna apriilip aallaqqaataaniit ingerlanneqalissapput, suliffeqarfillu taanna tuniniarneqassalluni.

Arctic Green Foodip pigisaasa ilaat aamma tuniniarneqarnissaat siunniunneqarpoq.

KNI-p ataani inissisimasuni, tassa Pilersuisumi aamma Polaroil-imi, sinneqartooruteqartoqarpoq.

Pilersuisumi 1 millioni koruunimik sinneqartoortoqarpoq, Polaroil-imilu 13,2 millioninik sinneqartooruteqartoqarluni.

Neqi A/S amigartoorfiuvoq, taanna 3,3 millioni koruuninik amigartoorfiusimammat.

Angusat KNI-mi siulersuisunit annertuumik naammagineqanngillat, suliffeqarfissuulli aningaasaqarniarnera ukioq manna ilorraap tungaanut sangutinneqarnissaa neriuutigineqarpoq.

KNI A/S-imi pisortaanermik nutaamik atorfinitsitsinissaq siulersuisuni oqaluuserineqarsimavoq, pisortaanerusussamilli suli toqqaasoqarsimanani.