KNAPK: Uummannami qaleralittassat nuunneqartariaqarput

Qaleralittassat ilaasa 4.kvartalimiit 3.kvartalimut nuunneqarnissaat ilaatigut kissaatigaat, KNAPK-minngaanniillu tamanna tapersersorneqarpoq
Silap angallateerarsortunut ukiakkut ulorianarsinnaasarnera, KNAPK-p siulittaasuata Leif Fontainep ilaatigut tunngavilersuutigaa:

- Sila ukiakkut anorlerajutsikkaangat aalisartut ataavartumik aalisarsinnanerat amerlasuutigut killeqalertarpoq. Taamaattumik angallatit annerit allamut nuussinnaagallartillutik periarfissagissaartuupput, kisianni mikinerusut aalisarsinnaanerat killeqalertarpoq, taamaammat paasilluarsinnaavara massakkut silaginnerusarnerani aalisarsinnaanissartik kissaatigimmassuk. Ilisimaneqarpormi qilalukkat ukiakkut isumalluutaasartut, KNAPK-p siulittaasua oqarpoq.

Qaasuitsup Kommunia Aalisarnermut Piniarnermut Nunalerinermullu Naalakkersuisumut Ane Hansenimut ammasumik allagaqaqqammerpoq, qaleralittassanik nalimmassaasoqarnissaa piumasarineqarluni.
Avannaata ingerlatsiviani kvartalikkaartumik ukioq manna pisassiisoqartalerpoq, maannamullu misilittakkat ataatsimut isigalugit ajunngitsutut nalilerneqaraluartut, naleqqussaasoqarnissaa pisariaqartutut nalilerneqarpoq.

Tassalu aalisartut qaleralinniit isertitaarukkallassapput, soorlu ukiut siuliini aamma pisartoq. Akileraartarnermut atugarissaarnermullu ataatsimiititaliap inassutaatut, ilaasortamik isertitaminnit ileqqaallaqqinnerulernisssaat anguniarlugu KNAPK-miit qanoq iliuuuseqarnersut,
siulittaasua Leif Fontaine aperaarput:

- Siuarsaasinnaanissaq killeqarpoq. Kattuffiinnaavugummi. Aningaasarsiornissamut aqqutissiuisinnaasumik immikkoortortaqanngilagut, aamma A/S-iunngilagut. Royal Greenlandip allallu tunisassiorfiit akisussaaffigaat, kisianni aamma naleqartitsinerulernissamik Naalakkersuinikkut siunnerfik anguneqassappat taava aalisartut atugaat pinngitsooratik pitsaanerulertussaapput, KNAPK-p siulittaasua Leif Fontaine oqarpoq.