KNAPK: Umiatsiaararsortut 296-it qaleralinnik aarlerinartorsiortitsinavianngillat
Aalisartut piniartullu kattuffiat KNAPK isumaqarpoq WWF pisisartunik taamatut kaammattuuteqarnermini mianersoqqissaartariaqartoq, qaleraleqassusermi kikkunnilluunniit iliimaqqissaarneqanngimmat.
- WWF-ip, nunarsuaq tamakkerlugu suliniaqatigiiffiusup, qaleralinnik nunatsinneersunik nunarsuarmioqatigiinnut kaammattuuteqassappat ilaqutariippassuit eqqorneqartussaassapput. Tamannalu akuerisinnaanngilluinnarparput. KNAPK-p siulittaasorigallagaa Leif Fontaine taama oqarpoq.
Qalerallit sinerissap qanittuani aalisarneqartut nungutaanissamut aarlerinartorsiortinneqartut allattorsimaffiannut ilanngunneqarsimanngitsut, WWF-ip Danmarkimi immikkoortortaqarfia radioaviisimut allappoq. Paasissutissanimmi nutaanik Pinngortitaleriffimmit pissarsisimapput, taamaattumillu tamanna isumaliutigeqqinniarlugu oqaatigalugu.
Matumani ajornartorsiutaasoq tassaavoq uumassusilinnik ilisimatuut naammattunik ilisimasaqannginnerat. Pinngortitaleriffimmi Qeqertarsuup Tunuani Uummannallu sulluani qaleraleqassuseq paasissutissaateqarfigaat, naak sinerissap annersaani qaleralinniartoqartaraluartoq. Aalisartullu uumassusilinnillu ilisimatuut qaleraleqassutsip ilisimasaqarfiginerusariaqarnera isumaqatigiissutigaat.
- Qaleraleqassutsip nunarput tamakkerlugu misissuiffigineqarnissaa KNAPK-p tungaanit ujartortuarsimavparput, tamannali Pinngortitaleriffiup aalajangigassaraa, KNAPK-p siulittaasorigallagaa oqarpoq.
Qalerallimmi pillugit ilisimat amerlanerusuuppata, pisassiissutillu ulllormit ullormut qaffanneqartarlutillu appartinneqartanngitsuuppata, WWF-p nunatsinni sinerissap qanittuani qaleralinniarnerup uumasut nungutaanissamut aarlerineqartorsiortinneqartut allattorsimaffiannut ilanngunniarlugit isumaliutigissanngikkaluarpaat
Sinerissap qanittuani aalisartut piniartullu kattuffiata SQAPK-ip KNAPK isumaqatigalugu WWF-ip pilersaaruteqarnera isumaqatiginngilluinnarpaa.
- WWF-ip taama oqarnera isumaqatiginngilluinarparput. Pinngortitaleriffik 2013-imi ataatsimeeqatigaarput - tassanilu paasissutissiissutigineqarpoq Qeqertarsuup tunuani aqutsiveqarfiullu sinnerani qalerallit nungutaanissamut aarlerinartorsiortinneqanngitsut, taakkulu ukiormanna ukiullu sinnerani pilersaarutigineqartutut aalisarneqarsinnaasut, SQAPK-p allaffeqarfiani pisortaq, Erik Lange, taama allappoq.
Sinerissap qanittuani qaleralinniarneq ulorianartorsiornerarlugu oqalunneq mianersuunneqartariaqartoq, Leif Fontainep oqaatigaa.
- Sinerissap qanittuani aalisartut, tassaasut angallateeqqat umiatsiaaqqallu, nunatsinni qaleraleqassutsimik aarlerinartorsiortitsinanvianngillat
Nunarsuaq tamakkerlugu pinngortitaq pillugu suliniaqatigiiffik WWF radioaviisimut saaffiginnippoq. Taakkua erseqqissaatiginiarpaat - Danmarkimi aalisakkat pisiarineqartarnerinut inassut - WWF-imit akisussaaffigineqarluni saqqummersinneqartartoq suli saqqummersinneqanngimmat.
- WWF-ip nunani allani allaffeqarfiini, soorlu Schweizimi, aalisakkat pisiarineqartarnissaannut inassut saqqummersinneqartarpoq - tassani kalaallit nunaata sineriaata qanittuani qalerallit aalisarneqartut nungutaanissamut ulorianartorsiortut allattorsimaffiannut ilanngunneqarsimavoq.
Imatut paasineqartariaqanngilaq WWF-ip allaffeqarfiini tamani isumaqartoqartoq kalaallit nunaata imartaani qaleralik nungutaanissamut ulorinartorsiortoq.
Aalisagartassanik pisassiisarnerup aqunneqarnerata ajornartorsiutaanera pissutigalugu WWF-ip immikkoortortaqarfiisa pisisartut kaammattorniarpaat qaleraleqarfinni aalajangersimasuni qalerallit aalisarneqartut pisiarineqannginnissaannik kaammatuuteqartoqarpoq, Nunarusuaq tamakkerlugu pinngortitaq pillugu suliniaqatigiiffiup WWFip Danmarkimi immikkoortortaqarfia radioaviisimut taama allappoq.
