KNAPK: Uggornaqaaq tusaatissatullu tiguarput
Puisit amiinik EU-mut eqqusseqqusiunnaarnissamut inatsit ukiut pingasut matuma siornatigut atuutilersinneqartoq inatsisitigut malersorneqarsinnaanngilaq.
Eqqartuussiviup taama aalajangernera, KNAPK-p uggoraa, tusaatissatullu tigullugu. KNAPK-p siulittaasua Leif Fontaine ima oqarpoq:
- Soorunami uggornaraluaqaaq, kisianni tassa eqqartuussivimmi suliat inerneri soorunami qanoq-iliuuseqarfigiuminaattarput. Naatsorsuutigaara Nunatsinninngaanniit KNAPK-minngaanniillu suliarisinnaasagut tassunga killeqartut, KNAPK-p siulittaasua Leif Fontaine oqarpoq.
Piniartut, Nunatsinni Canadamilu amminik tunisassiortartut, nunallu allat, ICC aamma KNAPK peqatigalugit EU-mik eqqartuussivilersuussigaluarpoq, puisit amiinik EU-mut eqqusseqqusiunnaarnerup atorunnaarsinneqarnissaa anguniagaalluni.
Naak naggueqatigiit Inuit puisit amiinik EU-mut tunisaqarsinnaagaluartut, EU-p ataatsimut isigalugu eqqusseqqusiunnaarnera naggueqatigiit Inuit tunissassiornerannik eqquinerlussimasoq, ICC-p KNAPK-llu oqaatigaat, assersuutigalugulu Københavnimi siorna maajip aallaqqaataani akerliussutsiminnik takutitsisoqarpoq, KNAPK-p aaqqissugaanik.
Puisit amiinik Nunatsinni tunisassiortarnerup piujuaannartitsineq tunngavigalugu suliaasoq pillugu Namminersorlutik Oqartussat paasititsiaasarpoq, KNAPK aamma Great Greenland peqatigalugu paasititsiniaasoqartarluni.
Aningaasat tassunga atorneqartussatut naatsorsuussat 865.000-it koruunit Namminersorlutik Oqartussat ukioq mannamut aningaasaliisutigaat, qanorlu sumorpiarlu atorneqassanersut pillugu isumaqatigiinniartoqartussaalluni:
- Suliap taassuma massakkut nanginnissaa KNAPK-minngaanniit suliniutigaarput, tassalu naatsorsuutigaarput piffissap massakkut ingerlanerani qaammarsaanissaq pillugu suliaqarnerput Inuit Sila-mik atserlugu pilersitatta ingerlaqqinnissaa naatsorsuutigalutigu. Namminersorlutik Oqartussat Great Greenlandilu suleqatigalugit, nunallu allat suleqatigalugit qaammarsaanissaq suliaq nangissavarput, KNAPK-p siulittaasua Leif Fontaine oqarpoq.
EU-mi eqqartuussiviup aalajangernera Canadami naalakkersuisut Nunat tamat niueqatigiinnikkut suleqatigiiffiannut WTO-mut ingerlateqqinniarpaat.
Great Greenlandimit oqaaseqartitsiniaraluaratta iluatsinngilarput.
