KNAPK: Tunitsiviit matoqqanerat akuersaarneqarsinnaanngilaq
Kisianni KNAPK tamatuma saniatigut annerusumik iliuuseqarnianngilaq, kattuffik piginneqataanngimmat, Aalisarnermulli Piniarnermullu Naalakkersuisoq, Ane Hansen, attaveqarfigisimavaa, neriuutigalugu tunitsiviit innuttasunit tiguneqarsinnaanissaat.
KNAPK-mit paasiuminaatsinneqarpoq akuerineqarsinnaananilu suliffeqarfik kiffartuussinissamik isumaqatigiissuteqarfigineqartup, tunitsivinnik ammatitsisussap matoqqatitsinera, tamannalu pissusissamisoortuungitsoq, KNAPK-ip siullittaasua Leif Fontaine oqarpoq.
Arctic Green Food-ip tunitsiviisa arfineq pingasut matoqqanerat pissutaalluni aalisartut piniartullu tunitsivissaqanngillat.
Aalisartut piniartullu tunitsivissaqannginnerat pillugu KNAPK qanoq iliuuseqarsinaanerat killeqartoq Leif Fontaine oqarpoq:
- KNAPK Arctic Green Food-imik piginneqataanngimmat qanoq iliuuseqarsinnaanera killeqarpoq. KNAPK kiffartuussinissamik isumaqatigiissuteqarlutik aningaasaliisunut tassalu Naalakkersuisunut tunitsiviit matoqqanerat pillugu missisoqqissaarneqarnissaannik, KNAPK Inatsisartuni ilaasortanut kajumissaaruteqarpoq, Arctic Green Food-ip tunitsivii matoqqasut innutaasunit tiguneqarnissaat Inatsisartuni oqallisigineqartariaqartoq.
