KNAPK: Tapiissutisinngikkutta CO2-mik aniatitsinerput millinavianngilaq

Aalisartut CO2-mik aniatitsinerpaanut ilaapput. Gassinik silaannarmik kissatsitsisartunik aniatitsinermik annikillisitsiniarluni suliniutissat pillugit nalunaarusiami tamanna atuarneqarsinnaavoq. Aalisakkalli akii appasimmata, aalisartut tapiissutinik tunineqanngikkunik, CO2-mik aniatitsinertik appartissallugu ajornakusoortissavaat. KNAPK-mi pisortaq John Biilmann oqarpoq.
Allattoq Jens Thorin
marsip 07-at 2009 16:05

- Aalisakkat akii appasipput, taamaammat atortorissaarutinik nutaanik tikisitsiortussagutta nutarsaallutalu aningaaliisoqartariaqarpoq. Angallatinik nutaanik sananermi tapiissutit amerlanerusariaqarput, John Biilmann oqarpoq, nangipporlu:

- Nutaanik angallatiliornermi avatangiisinik mingutsitsinnginnerusunik motoriliisoqarsinnaavoq, angallatillu pioreersut motoorii nutarsarneqarsinnaapput, KNAPK-p pisortaa oqarpoq.

CO2-mik aniatitsineq 2012-iutinnagu 8 procentinik annikillisinneqartussaavoq, angussagutsigulu aningaasaliissutissanik ujartuivusi. Tapiissutinik pisinnaanngikkussi taava qanoq pisoqassava?

- Tamanna akiuminaatsippara. Tapiissutinik pisinnaanngikkutta aalisartut ajornartorsiulersinnaapput. Nunarsuarmi akit appasikkallartillugit angusassat anguniassallugit ajornakusuussaqaaq, John Biilmann Radioaviisimut oqarpoq.

CO2-mik aniatitsinerup annikillisarneqarnissaa pillugu tapiissutinik qinnuteqartoqarsimanngitsoq, Aalisarnermut piniarnermullu naalakkersuisoqarfiup pisortaa Amalie Jessen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq