KNAPK, Sulisitsisut Peqatigiiffiat aamma Suliffiutillit Kattuffiat suleqatigiissitami ilaasortaanngillat
- Upernaaq pilersitsiniartoqarneranik tusagaqarnikuuvugut, uagulli allagarsinikuunngilavut kikkullu peqataatinneqarneranik sianigisaqarfiginagu, KNAPK-p pisortaa Petrus Biilmann oqarpoq.
Naalakkersuisut Aningaasanut Inatsisissatut Siunnersuutaanni atuarneqarsinnaavoq suliffissaaleqisut ikilisarniarlugit, aalisarnermik suliallit peqataaffigisaannik, suleqatigiissitamik pilersitsisoqarsimasoq.
Suleqatigiissitap suliai sumut killinnersut paaserusullugu Radioaviisimit kattuffinnut attuumassuteqarsinnaasunut paasiniaanitsinni paasinarsivoq arlaannaataluunnit suleqatigiiffik pilersinneqarsimasoq ilisimanngikkaa suleqataarusunnersulluunnit aperineqarsimanngitsut.
LÆS OGSÅ Fiskerigruppe drøftet ved forårssamling
Kalaallit Nunaanni Aalisartut Piniartullu Kattuffianni pisortaq Petrus Biilmann oqarpoq Naalakkersuisut suleqatigiissitamik pilersitsisimanerannik tusagaqarsimanatik.
- Naamik tassa paasisimasaqarfiginngiivippavut. Inatsisartut namminneq eqqartornikuugaat nalunngilarput, radiokkooraangata tupigusorujussuaannartarpugut, Petrus Biilmann nassuiaavoq.
Sulisitsisut peqataanngippata sunniuteqarnavianngilaq
Sulisitsisut Peqatigiiffiat suleqatigiissitap pilersinneqarsimaneranik tusagaqarsimanngilaq, siulittaasorli Henrik Leth qaaqquneqarnissaminut neriuuteqarpoq.
- Naalakkersuisut aalisarnermik attuumassutilinnik avaqqutaarinnillutik suliaqassagaluarunik pissarsiaqangaarsinnaanissaat ilimaginngilara, suliartik iluatsissagunikku suleqatiserisariaqarpaatigut, Henrik Leth erseqqissaavoq.
Aalisarnermut Siunnersuisoqatigiit aamma peqataatinneqanngillat
Suliffiutillit kattuffiat NUSUKA aamma saaffigineqarsimanngitsoq siulittaasuat Gerth B. Lynge oqarpoq.
- Suleqatigiissitami suleqataarusunnersugut aperineqarnikuunngilavut aamma kikkunnit inuttaqarnersoq qangalu aallartissimanersoq sianigisaqarfiginngiivipparput.
