KNAPK Sulisitsisut Peqatigiiffiannit isornartorsiorneqarpoq

KNAPK-p misissuisitsinerani takuneqarsinnaavoq raajat Kalaallit Nunaanneersut Canadameersullu Danmarkimut tunineqaraangata akii assigiinngitsorujussuusut.
Raajat qalipaajariikkat Nunatsinneersut kiilumut agguaqatigiissillugu 24 koruuneqartut, Canadameersut 38 koruunit missaanni akeqartarput.

Kisitsisilli taakku atorneqarsinnaanngitsut, Sulisitsisut Peqatigiiffiata GA-p oqaatigaa.
GA misissuisitsinermut siullermut atatillugu Naalakkersuisunut ukioq manna juunimi akissuteqarput. Misissuisitsinerlu nutaaq, kisitsisinik 2010-meersunik tunngavilik qanittukkut saqqummiunneqarpoq.

- Paasissutissanik nutaanik tunngaveqarluni nalunaarusiortoqarsimanera tupigusuutigaara. Nalunaarusiarmi siulleq kukkuneqarpoq, nalunaarusiarlu nutaaq aamma kukkuneqarluni. Imaassinnaavoq piumasaqaatit tunngavigalugit nalunaarusiortoqarsimasoq, kisitsisilli kukkusut assersuutigineqarput, Sulisitsut Peqatigiiffianni pisortaq Henrik Leth oqarpoq.

Danmarkimut tunisinermi akigitinneqartunut atatillugu kisitsisit nalunaarusiami atorneqartut kukkuneqartut, taassuma oqaatigaa.
Raajammi suminngaanneersuuneri nalunaarusiami ersersinneqanngilaq.

Raajammi Canadameersut sinerissap qanittuaneersuupput, raajallu Kalaallit Nunaanneersut 60 procentii avataasiortuneersuullutik.

Canadamiut raajat imermik qalliusertarpaat, tamannalu pissutigalugu akit 10 procentinik ilanngartariaqassallutik.

Danmarkimut tunisinermi akigitignneqartut aamma assigiinngissuteqarput. Canadamiummi raajanik tunisigaangamik raajat aalajangersimasumik akeqarnissaat isumaqatigiissutigereertarpaat, assartorneqarnissaanullu akit matumani ilaatinneqareertarlutik.
Raajat Canadameersut taamaammat akisunerusutut isikkoqalersarput, Kalaallit Nunaanneersunut sanilliullugu taama isikkoqarsinnaallutik.
Raajalli Kalaallit Nunaanneersut "nuunneqaannartarput", tassungalu atatillugu aningaasartuutit tunisinermi ilaatinneqartaratik.

Tamakkorpassuillu kattukkaanni raajat Canadameersut Kalaallit Nunaanneersullu akii assigiinngissutaat minnerulersarpoq, GA-p pisortaa Henrik Leth oqarpoq:

- Akit 2 koruunit missaannik nikingassuteqarput, Canadamiut matumani immaqa aningaasarsiornerullutik. Kisitsisilli tunngaviginiarneqartut qimerluualaaqqikkutsigit qularutiginngilara akit isertitallu assigiittorujussuussasut, aalisartullu Kalaallit Nunaanneersut isertitaqarnerusartut, Henrik Leth oqarpoq.