KNAPK: Suliffeqarfissuit pissaaneqarpallaarput

Tunup Avannaani Nuna allanngutsaaliukkat avataani imaani qaartitsisarluni misissuinissat qilalukkanut aavernullu pitsaanngitsumik kinguneqarsinnaasoq, ICC isumaqarpoq. KNAPK-p ugguaraa, pisortaniit Amerikamiullu piginneqatigiiffiannit imaani qaartitsisarluni misissuisussamiit GXT-miit tusarniaaneq naammaginanngimmat.
Allattoq Nauja Møller
juulip 25-at 2011 12:09

Tusarniaaneq nunani allamiut piginneqatigiiffiisa piumasaat malillugu pivoq, inuiaqatigiit kalaallit piumasaat tusaaneqarani, KNAPK-p pisortaa, Alfred Jakobsen, oqarpoq:

- Maannamut ingerlatseqatigiiffissuit soorlulusooq soqutigisaat naakkaarnarfiginerullugillusooq ingerlaaseqartugut, tamanna ajuusaarnarpoq, Alfred Jakobsen oqarpoq.

Alfred Jakobsen malillugu suliffissuit pissaaneqarpallaarnermi saniatigut tusarniaanermi piffissaliinerup sivikippallaarnera aamma isornartorsiorpaa:

- Pappiaranngorlugit nassiussuunneqanngillat, taamaattumillu tusarniaanermi KNAPK-minngaanniit immikkoortortaqarfinnut sinerissam siaruartissagutsigit, taava nittartagaq innersuussutigiinnarsinnarsinnaanngilarput. Tusarnarniaanerit taama nukinginnartigisumik ingerlanneqarnerat assut ajornartorsiutigaarput, Alfred Jakobsen oqarpoq.

Oqaatsillu ajornartorsiutaaneri aamma uparuarpai:

- Aalisartut piniartullu tuluttut ulluinnarni oqaatsinik atuisuunngillat. Uanilu pineqartut teknikkikkut atortulersuutit allallu nutaaliaasorujussuit oqartaatsit assigiinngitsut atorlugit nalunaarutit, nassuiaatit erseqqissumik paasitissagaanni piffissaqarluni itisuumik sukumiisumillu paasinnissamut periarfissaqarlunilu taakkua isummersorfiginissaat pingaartorujussuupput, Alfred Jakobsen oqarpoq.

Tusarniaaneq pillugu paasissutissat amerlanersaat tuluttut allassimapput, naalisaanerit ilamerngi eqqaassanngikkaanni. Paasissutissat amigartillugit sukumiisumik ilaasortagut tusarniaavigisinnaanngilagut, KNAPK isumaqarpoq:

- Tunngaviusumik isummersussagaanni taava aamma misissuinerit ingerlanneqartussat qanorpiaq sunniuteqassanersut pillugit immikkut ilisimasallit nalilersuinerat aamma piniartut sukumiisumik takusinnaasariaqarpaat paasisinnaallugillu, taakkuli tunngavigalugit isummersorsinnaassallutik. Pissusissamisoornerpaassagaluarpoq taamatut ingerlasoqarsinnaassagaluarpat, Alfred Jakobsen oqarpoq.

Sajuppillatsitsilluni misissuinerit piniartunut sunniuteqarsinnaapput, ICC ernumagisaa eqquutissappat, tassa misissuillutik nipiliortut ingerlatsinerallu arferit uumasullu imarmiullu allat qimarngulissappata:

- Maani pisortatut sulisuulluni, piniartut ulluinnarni atugaat qanoq sunnerneqassanersut pillugit allaffimminngaannit ua nammineerlunga ilisimasinnaanngilakka, qanorpiaq ukua misissuinerit kingunerisaanik piniartut inuuniarnerat sunnerneqarsinnaanersoq. Taannartaa uanga soorunalimi nammineerlunga imatut isummersorfigisinnaanngilara, piniartunukua isummersortinneqartussat, KNAPK-p pisortaa, Alfred Jakobsen, taama oqarpoq.

Immami miluumasut sajutitsilluni misissuinernit sunnerneqarsinnaanerannik, ICC-i Radioaviisimut sapatit akuneranni kingullermi oqarnera Alfred Jakobsenip taperserpaa.
Taamaammat pisortat pissutsinik misissueqqaarnatik Tunup avannaani imartani illersukkani imaanik sajutsitsilluni misissuisinnaanissaq akuersissutigisimammassuk, ICC-tulli akuerisinnaanngilaa.