KNAPK sukannernerulersitseqqusisoq: Takornariartaassuit nakkutigineqalerlik

Takornariartaassuit nunatsinnut tikittartut nunatta pinngortitaanut inuussutissarsiutigalugulu piniartunut ajornartorsiortitsipput. Tamannalu KNAPK-p siulittaasuata Nikkulaat Jeremiassenip sukannersumik pilertortumillu iliuuseqarfigineqartariaqarsoraa.

Allattoq Anders Rytoft

aggustip 29-at 2023 07:38

Nutserisoq Nutaarsiassaqartitsivik / Nyhedsredaktionen

Takornariartaassuit tuusintilikkuutaanik ilaasullit nunatsinnut aasaq manna tikittut hunnorujulikkaajupput. Tamannalu arajutsisimaneqanngilaq. Avannaanimi Tunumilu piniartut takornariartaassuit ilaatigut qernertanik qilalugiarnermi aamma akornutigaat.

Qaanaami KNAPP-p siulittaasua Ittoqqortoormiinilu piniartut peqatigiiffiata siulittaasua KNR-imut taama oqarput.

Piniagassammi takornariartaassuit tatammutigisaraat, taakku oqarput.

Igitassaminnik nunatta imartaani imaajartartut

Takornariartaassuit Avannaani Tunumilu piniartuniinnaq ajornartorsiutaanngillat.

Kalaallit Nunaanni Aalisartut Piniartullu Kattuffiata (KNAPK) siulittaasua, Nikkulaat Jeremiassen, taama ilisimatitsivoq.

- Tassa ajornartorsiut una annertusiartorpoq sukkasuumik, taavani tappavanilu kisimi piunngilaq. Nunatta sineriaa tamaat kaajallallugu piniarnikkut annertuumik ajornartorsiortitsipput aamma mingutsitsinikkut, taanna Qanoruumut oqarpoq.

Aamma atuarukPiniartut: Takornariartaassuit akornusersorpaatigut

Takornariartaassuit eqaloqarfinnut, ikkattumi ikkannernut aalisarfinnut tuttoqarfinnullu aamma akornutaasut, taanna ilanngullugu oqarpoq.

Takornariartaassuit igitassaminnik nunatta imartaani imaajartartut, aalisartut ilaat KNAPK-mut nalunaarput.

- Taamaattumik inuutissarsiut innarlerneqassanngippat aammalu piuneerutinneqassanngippata piaartumik iliuuseqartoqartariaqarpoq nakkutigiineqarnissaat eqqarsaatigalugu, Nikkulaat Jeremiassen oqarpoq.

Takornariartaassuit nakkutigineqalerlik

Takornariartaassuit kangerlunni aasaakkut arfeqarluartartuni qanoq angallannissaannik nalunaarutissaq Naalakkersuisut suliarileruttorpaat.

KNAPK-p siulittaasuata tamanna nalunagu oqarpoq nangillunilu:

- Taannali suli naammasseqqajanngilaq.

Takornariartaassuimmi nakkutigineqalinngippata, Naalakkersuisut nalunaarusiassaat isumaqangaassanngitsoq, KNAPK-p siulittaasua isumaqarpoq.

- Taamaattumik inuutissarsiut innarlerneqassanngippat aammalu piuneerutinneqassanngippata piaartumik iliuuseqartoqartariaqarpoq nakkutigiineqarnissaat eqqarsaatigalugu.

Takornariartaassuit piniarfinniittarnerat qanoq isumaqarfigineraat Naalakkersuisut aperaavut, taakkuali maannamut suli akinngillat.