KNAPK suaat akiinut: Akuerisariaqarsimavarput
- 22 koruunit bonusilu 1 koruuni angoqqarsimavarput, Nikkulaat Jeremiassen KNR-mut oqarpoq.
Aalisartut ulluni 18-ni tunisisinnaanatik utaqqiloorsimasut ataasinngornermit tunisisinnaanngorput.
AAMMA ATUARUK Nipisat suaat isumaqatigiinngissutaaneri qaangiuttoq: Suannik tunisisinnaaneq ammaanneqarpoq
Taakkua Royal Greenlandip KNAPK-llu kilomut aki 22 koruuniusoq isumaqatigiissutigineq ajulermassuk ulluni taakkunani aalisanngillat. Royal Greenland akiliinerorusunnikuunngilaq, KNAPK-llu 22 koruunit amigarinikuullugit. Taamaaligamillu nipisanniarnerup qaqugu aallartinniassa aamma isumaqatigiissutigisinnaajunnaarpaat.
Aaliaartulli kattuffiata KNAPK-p ingerlatseqatigiiffiullu nipisat suaannik pisisartup annerpaap, Royal Greenlandip, kilomut aki ataasinngornermi isumaqatigiissutigaat.
Siornamit pitsaanerunngitsoq
Aki KNAPK-p naammagisimaarsimanngeqisaa qaavatigut koruunimik ataatsimik bonusilerlugu illua-tungeriit atsioqatigiissutigaat.
- Toqqagassat marluinnanngorput. Aalisarneq ingerlanneqassanersoq imaluunniit aalisartoqassannginnersoq. Aalisartoqassanngippat annaasaq annertuallaartutut takorloorlutigu ulluinnarni aqutsisut, siulersuisuunerit siunnersuisooqatigiillu peqatigeqqinnaarlugit taamatut aalajangiinnarnikuuvugut, Nikkulaat Jeremiassen oqarpoq.
Aki upernaaq manna isumaqatigiissutaasoq siornamit pitsaanerunngilaq. KNR-p paasissutissaatai naapertorlugit, taakku siorna kiilumut 21 koruunip 24 koruunillu akornanni akeqarput.
AAMMA ATUARUK Aki pillugu isumaqatigiinnginneq: Nipisanniarneq suli aallartinngilaq
Aalisartut ullorpaalunni qassusinnginnamik utaqqikatassimapput. Kattuffiatalu aalisapallalernissaat isumaqatigiinniannerminni anguniaannalersimavaa.
- Utaqqikatanneri aallaavigalugit aallartilertupallannissaat anguniaannarsimavarput naggataani, Nikkulaat Jeremiassen oqarpoq.
Royal Greenlandimut 800 tonsit tulaanneqarsinnaassasut
Royal Greenlandip tunisassiorfimmini tamani suaat 700 tonsit pisiarisinnaallugit siusinnerusukkut nalunaarutigaa. Illua-tungeriilli isumaqatigiinniarneranni taanna 100 tonsimik oqimaalineqarpoq. Taamaalilluni Royal Greenlandip 800 tons pisiarissavaa. Nalakkersuisut nuna tamakkerlugu nipisat suaannik 1475,5 tonsimik tunisisoqarsinnaassasoq aalajangiinikuupput.
AAMMA ATUARUK Nipisaat suaannik aalisartut akerliusut: Akit qaffanngippata aalisarnianngilanga
Nunatta kitaata sineriaani aqutsiveqarfiit arfineq marluupput, taakkunanilu tallimat maanna aalisarfiusinnaapput.
Aqutsivinni tamani aalisarfissat ullut ataannartumik 60-ussapput. Pisassalli ullut takkua qaangiutsinnagit nungussappata aalisarneq unissasoq, Naalakkersuisut allapput.
