- Royal Greenlandip nunami raajaleriffeqarnini aaqqissuuteqqittariaqarpaa. KNAPK-p siulittaasua Peter Olsen, Qasigiannguani raajarniat Sisimiunut massakkumiit tulaassiartortariaqalernerannut taama oqaaseqarpoq.
Tassa Ilulissani qalerallerineq annertusippat raajalerineq annikillisinneqassaaq, tamatumalu kingunerisaanik Qeqertarsuup Tunuani raajarniat ilaat sisamat, taakkununnga ilaallutik Qasigiannguani raajarniutit marluk, pisaminnik Sisimiunut tulaasiartortalissapput.
Tamanna akuersaarneqarsinnaanngitsoq Qasigiannguani aalisartut peqatigiiffianni siulittaasoq Jens Sandgreen ulloqeqqanut oqarpoq. Tamatumunngalu Peter Olsen isumaqataavoq:
- KNAPK-mit aamma akuersaarsinnaanngivipparput, raajarniat tunisiarnerminni taama killilersuiffigineqarnerat. Avannaamiut kisimik taama pineqanngillat aamma kujataamiut taama pineqarput. Sisimiunut annertoorujussuarmik tulaassuisoqarpoq taavalu killilersuineq pinngitsoorneqarsinaanani. Taamaattumik piumasaraarput nunatsinni tunisassiorfiit nutaamik nalilersuiffigineqartariaqartut, aammalu Qeqertarsuup Tunuani raajaleriffimmik minnerpaamik ataatsimik ammaasoqartariaqartoq.
Sisimiuni Royal Greenlandip naammassisinnaasaatut naatsorsuutai annertunaakkamik naatsorsorneqarsimasut KNAPK isumaqarpoq.
- Sisimiuni Royal Greenlandip nammineq naatsorsuusiai tunngavigalugit 30.000 tonsit ukiumut naammassineqarsinnaapput. Kisianni piviusoq imaappoq; Sisimiut tunisassiorfianni siorna 16-17.000 tonsit naammassineqarsimapput, 30.000 tonsiunngitsut.
Ukioq manna 20.000 tonsit immaqa anguniarneqarsinnaapput. Naatsorsuutigineqartutut 30.000 tonsit naammassiniarneqassapata atortut sulisut eqqarsaatigalugit suna tamavimmi ukiup ullui tamaasa ajortoqartussaassanngilaq, kisianni sumiluunniit sulisut amigaatigineqartarput atortunillu ajutoortoqartarpoq.
Peter Olsen oqarpoq taamaattumik Qeqertarsuup Tunuani raajaleriffimmik pilersitsisoqarnissaa piumarisigitsik, taavalu ingerlaartarnerujussuaq eqqarsaatigalugu raajat akiisa saniatigut raajarniat akimik aamma taperneqartariaqaraluartut.
Qasigiannguarmiut allaneersullu Sisimiunut tulaassiartortariaqalerpata siorna 2006-imi misigineqarsimasoq, tassalu tulaassinermi utaqqisaqattaattarneq taamalillunilu sakkortuumik killilersuilerneq ukioq manna uteqqinneqassasoq, tamannalu aamma sinerissap qanittuani raajartassat tamakkinngitsoorneqarnerannik kinguneqarsinnaasoq Peter Olsen aamma oqarpoq.
