KNAPK: Sinerissap qanittuani aalisartut pingaartinneqarnerussapput
KNAPK isumaqarpoq aalisarneq pillugu inatsisissaq suli iluarsisassaqartoq, assersuutigaat inatsimmi aalisartut nunaqavissut, aalisartunit nunanit allaneersunit pingaartinneqarnerusariaqarnerat.
Naalakkersuisut siulittaasuata Hans Enoksenip inatsisartut ukioq suliffiusoq tallimanngormat aallartimmassuk, oqalugiaammini aalisarneq piniarnerlu pillugit oqaasii isumalluarfigigaluarlugit amigaateqartut, Aalisartut Piniartullu Kafttuffianni siulittaasoq Peter Olsen oqarpoq:
- Aalisarnermut inatsisissaq eqqarsaatigalugu nuannaarutigaarput nammineq oqaatigimmagu isumaqatiginninniarsinnaanermut ammalluni, tamannalu assorsuaq isumalluarfigaarput, KNAPK-p siulittaasua oqarpoq.
Isumaqatigiinniarfigineqassagunillu pingaartitatik ima eqqaavai.
-Isumaqatigiinngissutigisinnaasagut annertoorujussuartut uanga oqaatigisinnaanngilakka, kisianni angallatit aningaasalersorneqarnerannut tunngasut taavalu sinerissap qanittuani raajartassat selskabit pisinnaasaat paragraffikkaarlugit eqqartorneranni uagut aalisarnermut inatsisissami sinerissap qanittuani raajarniarnissamut tunngasunik pitsaanerusumik siunnersuuteqarpugut, oqarpoq.
Assersuutigaa Kalaallit Nunaata raajartassaataasa 130.000 tonsiusut ullumikkut avataasiortunut 57 procentimik sinerissallu qanittuani raajarnianut 43 procentimik avissimanerat. KNAPK-p piumasaraa kisitsisit 50 procentinngortinneqarnissaat.
- Sinerissap qanittuani selskabinut raajartassat ullumikkut 10 procentimiittut aamma 15 procentinngortinnissaat piumasaraarput, sinerissap qanittuani aalisartut inerisarneqarnissaat tapersersorluinnaratsigu, Peter Olsen oqarpoq.
Raajartassat siunissami 130.000 tonsit ikiliartortinneqalissagaluarpata ilaasortat raajartassanik amigaateqalinnginnissaat taamaalillutik angujumavaat.
Aalisartut piniartullu pikkorissartinneqartarnissaannut aningaasaliinerunissamik Naalakkersuisut siulittaasuata neriorsuinera aamma isumalluarfigaat.
- Neriuppunga oqaasiinnaanani aalisartut piniartullu pikkorissartinneqartarnerannut aningaasat atorneqartartut qaffaaffigineqassasut. Neriuppunga, uterlugu neriuppunga oqaasiinnaanani piviusunngortinneqassasoq, tassami aningaasanut inatsimmi ikilisaaffigineqarnissaat siunnersuutigineqarsimammat, nangippoq.
- Naalakkersuisut siulittaasuata oqariartuutini piviusunngortittariaqarpaa, taannalu qilanaarluta pissangallutalu utaqqissavarput, ilumut taamaalissanersoq.
Peter Olsen aamma oqarpoq, piniartunut tunngasut ESU-mullu aningaasaliinerunissamut tunngasut isumalluarnartutut isigigitik.
Aalisarnermut tunngasunik suliaqartussamik ataatsimiititaliortoqarnissaanik siunnersuuteqarsimanertik aamma piviusunngortinneqartariaqartoq ilanngullugu oqaatigaa.
