KNAPK SIK-mit akerlilerneqarpoq
- Royal Greenland namminersortunit pigineqalissagaluarpat, tunitsiviit massakkut atuuttut arlallit matunissaat ernummatigaara.Taamaattoqassagaluarpammi SIK-mi ilaasortavut, KNAPK-milu ilaasortat, suliffissaarutissapput, SIK-p siulittaasua, Jess G. Berthelsen, oqarpoq.
Naalakkersuisut siulittaasuata, Kuupik Kleistip, ukiortaami oqalugiarnermini Royal Greenlandip namminersortunngorsarneqarnissaa eqqaanngimmagu, KNAPK-p siulittaasuata Leif Fontainep pakatsissutigaa. Tunisinermi akigititaasut ima appasitsigaat, sumiiffiit ilaanni aalisartutut piniartutulluunniit inuussutissarsiuteqarniarneq imminut akilersinnaanani, Leif Fontaine isumaqarpoq.
Namminersorlutik Oqartussat Royal Greenlandillu akornanni kiffartuussinissamik isumaqatigiissummi Kangaamiut Atammillu ilaatinneqanngillat. Nipisat suaannik tunisisarnerup avataani imminut akilersinnaagaangat tunitsiviit aatsaat ammatinneqartarumaartut, Royal Greenlandip erseqqissaatigaa.
Tassalu Royal Greenland namminersortunngorsarneqassappat pissutsit taamaattorpiaat SIK-p ernummatigai: - Taava suliffissuit tunitsiviillu imminnut akilersinnaasut kisimik ammatinneqalissapput, Jess G. Berthelsen naggasiivoq.
